zabt-e-fughan baja sahi gham ke asar ko kya karun

zabt-e-fuġhāñ bajā sahī ġham ke asar ko kyā karūñ

nāla-e-shab ko kyā karūñ āh-e-sahar ko kyā karūñ

sub.h-e-shab-e-firāq bhī shām-e-alam se kam nahīñ

jis meñ na koī nuur ho aisī sahar ko kyā karūñ

fitrat-e-ishq ne mujhe daulat-e-dard baḳhsh dī

tā.at-e-shab se kaam kyā zikr-e-sahar ko kyā karūñ

sub.h-e-azal kī raushnī merī nazar meñ hai abhī

nūr-e-sahar to aap haiñ nūr-e-sahar ko kyā karūñ

shām-e-alam kī zulmateñ kaafī haiñ mere vāste

maiñ to balā-nasīb huuñ le ke sahar ko kyā karūñ

sub.h meñ ab kahāñ vo husn shaam meñ ab kahāñ vo kaif

ālam-e-intizār ke shām-o-sahar ko kyā karūñ

aish meñ bhī ḳhayāl-e-ġham māne-e-zauq-o-shauq hai

ai shab-e-vasl-e-dil-navāz vahm-e-sahar ko kyā karūñ

mere nasīb meñ nahīñ jalva-e-sub.h-e-ārzū

'kaukab'-e-shām-e-ġham huuñ maiñ najm-e-sahar ko kyā karūñ

zabt-e-fughan baja sahi gham ke asar ko kya karun

nala-e-shab ko kya karun aah-e-sahar ko kya karun

subh-e-shab-e-firaq bhi sham-e-alam se kam nahin

jis mein na koi nur ho aisi sahar ko kya karun

fitrat-e-ishq ne mujhe daulat-e-dard baKHsh di

taat-e-shab se kaam kya zikr-e-sahar ko kya karun

subh-e-azal ki raushni meri nazar mein hai abhi

nur-e-sahar to aap hain nur-e-sahar ko kya karun

sham-e-alam ki zulmaten kafi hain mere waste

main to bala-nasib hun le ke sahar ko kya karun

subh mein ab kahan wo husn sham mein ab kahan wo kaif

aalam-e-intizar ke sham-o-sahar ko kya karun

aish mein bhi KHayal-e-gham mane-e-zauq-o-shauq hai

ai shab-e-wasl-e-dil-nawaz wahm-e-sahar ko kya karun

mere nasib mein nahin jalwa-e-subh-e-arzu

'kaukab'-e-sham-e-gham hun main najm-e-sahar ko kya karun