zabt-e-gham hai be-qarari mein qarar aane ka nam

zabt-e-ġham hai be-qarārī meñ qarār aane kā naam

yaañ vafā kā naam hai jaañ se guzar jaane kā naam

sham.a ḳhud jaltī hai mahfil meñ ujāle ke liye

jāñ-nisārī meñ sivā hai phir bhī parvāne kā naam

gāmzan haiñ jo junūñ kī raah par un ke liye

zindagī hai bas isī dil meñ samā jaane kā naam

koī dīvāna yahāñ thā koī farzāna magar

lauh-e-hastī par na dīvāne na farzāne kā naam

yuuñ masāfat meñ sarāboñ kā rahā hai sāmnā

lag rahā hai ab haqīqat meñ bhī afsāne kā naam

naam kī ham jin ke maalā jap rahe the raat din

un ke lab pe thā musalsal ek begāne kā naam

bhaTke bhaTke āj-kal 'ādil' haiñ saare rahnumā

jaise manzil rakh liyā rasta bhaTak jaane kā naam

zabt-e-gham hai be-qarari mein qarar aane ka nam

yan wafa ka nam hai jaan se guzar jaane ka nam

shama KHud jalti hai mahfil mein ujale ke liye

jaan-nisari mein siwa hai phir bhi parwane ka nam

gamzan hain jo junun ki rah par un ke liye

zindagi hai bas isi dil mein sama jaane ka nam

koi diwana yahan tha koi farzana magar

lauh-e-hasti par na diwane na farzane ka nam

yun masafat mein sarabon ka raha hai samna

lag raha hai ab haqiqat mein bhi afsane ka nam

nam ki hum jin ke mala jap rahe the raat din

un ke lab pe tha musalsal ek begane ka nam

bhaTke bhaTke aaj-kal 'adil' hain sare rahnuma

jaise manzil rakh liya rasta bhaTak jaane ka nam