zabt-e-ulfat ka yahi hum ko sila mil jae

zabt-e-ulfat kā yahī ham ko silā mil jaa.e

dasht meñ aur koī ābla-pā mil jaa.e

āgahī aur ka.ī naqsh banā saktī hai

tum jo insān ko DhūñDo to ḳhudā mil jaa.e

yahī behtar hai ki ḳhud raah meñ gum ho jaa.eñ

is se pahle ki koī rāh-numā mil jaa.e

aao zanjīr kī jhankār pe ham raqs kareñ

kyā ta.ajjub jo yūñhī jins-e-vafā mil jaa.e

isī dhun meñ to ham āvāra phirā karte haiñ

kahīñ shāyad tire āñchal kī havā mil jaa.e

ab tirā dhyān hai yuuñ jaise añdherī shab meñ

ittifāqan koī miTTī kā diyā mil jaa.e

zabt-e-ulfat ka yahi hum ko sila mil jae

dasht mein aur koi aabla-pa mil jae

aagahi aur kai naqsh bana sakti hai

tum jo insan ko DhunDo to KHuda mil jae

yahi behtar hai ki KHud rah mein gum ho jaen

is se pahle ki koi rah-numa mil jae

aao zanjir ki jhankar pe hum raqs karen

kya tajjub jo yunhi jins-e-wafa mil jae

isi dhun mein to hum aawara phira karte hain

kahin shayad tere aanchal ki hawa mil jae

ab tera dhyan hai yun jaise andheri shab mein

ittifaqan koi miTTi ka diya mil jae