zabt ka hausla baqi na shakebai hai

zabt kā hausla baaqī na shakebā.ī hai

tirī chāhat mujhe kis moḌ pe le aa.ī hai

be-sabab bhī to hue ham na asīr-e-gesū

dil ne bahkāyā hai yā laġhzish-e-bīnā.ī hai

dil kī duniyā meñ huī phir koī halchal paidā

is qadar rāh-e-vafā aaj jo gahnā.ī hai

koī bhī to na shab-e-tār meñ kaam aaya mire

kahne ko chāñd sitāroñ se shanāsā.ī hai

saañs lene pe hai pābandī duā jiine kī

ai masīhā ye bhalā kaisī masīhā.ī hai

apnī hī zaat meñ ik hashr bapā rahtā hai

dil tamāshā hai mirī aañkh tamāshā.ī hai

tirī jānib hī sadā rakhtī hai maa.il mujh ko

koī aisī tire atvār meñ gahrā.ī hai

un ke kūche se gurezāñ to nahīñ huuñ 'sā.ir'

roz kā milnā bhī to bā.is-e-rusvā.ī hai

zabt ka hausla baqi na shakebai hai

teri chahat mujhe kis moD pe le aai hai

be-sabab bhi to hue hum na asir-e-gesu

dil ne bahkaya hai ya laghzish-e-binai hai

dil ki duniya mein hui phir koi halchal paida

is qadar rah-e-wafa aaj jo gahnai hai

koi bhi to na shab-e-tar mein kaam aaya mere

kahne ko chand sitaron se shanasai hai

sans lene pe hai pabandi dua jine ki

ai masiha ye bhala kaisi masihai hai

apni hi zat mein ek hashr bapa rahta hai

dil tamasha hai meri aankh tamashai hai

teri jaanib hi sada rakhti hai mail mujh ko

koi aisi tere atwar mein gahrai hai

un ke kuche se gurezan to nahin hun 'sair'

roz ka milna bhi to bais-e-ruswai hai