zahanat ne nai duniya ki botiqa murattab ki

zahānat ne na.ī duniyā kī botīqā murattab kī

kahānī hāshiye par jā chukī shā.ir ke mansab kī

tirī ye gol duniyā to kuaañ hai maut kā yā-rab

maiñ chakrāyā tavāzun meñ to paa.ī daad kartab kī

na jaane aañkh ne kyā dekh kar tausī.a use dī hai

vagarna ḳhvāb kī muddat to puurī ho chukī kab kī

sabā ḳhushbū ko āñdhī gard ko aage baḌhātī hai

yahāñ sab fikr phailāte haiñ apne apne maktab kī

hamārī kahkashāñ ke vast meñ tārīk rauzan hai

isī meñ mahv hotī jā rahī hai raushnī sab kī

maiñ un se surma.ī sub.hoñ kī tamsīleñ nichoḌūñgā

lagī haiñ haath kuchh parchhā.iyāñ bhīgī huī shab kī

falak se kaam ke manzar kashīd ik roz kar lūñgā

zamīñ se aḳhz kar lūñgā fazā.eñ apne matlab kī

mileñgī do tamannā.eñ to hāsil kuchh nayā hogā

ki ajzā se alag hotī hai ḳhāsiyyat murakkab kī

hamārā zauq-e-naqqāshī nahīñ hai aaj kā pyāre

zabāñ tashkīl ke ġhāroñ meñ thī ye lahr hai tab kī

kahīñ zarre ko apnī mauj meñ uḌtā huā dekho

to shāyad tum samajh paao hayāt āzād-mashrab kī

nahīñ ma.alūm kis shamsī fazā ke paas se guzrā

chamak baḌhne lagī imkān ke dum-dār kaukab kī

siyāhī phail kar dil se jabīñ tak aan pahuñchī hai

badal dī haiñ musalsal sar-kashī ne sūrateñ sab kī

guzar jūñhī farāmoshī ke dariyā se huā merā

vahīñ apnī surāhī āb-e-nisyāñ se labālab kī

zahanat ne nai duniya ki botiqa murattab ki

kahani hashiye par ja chuki shair ke mansab ki

teri ye gol duniya to kuan hai maut ka ya-rab

main chakraya tawazun mein to pai dad kartab ki

na jaane aankh ne kya dekh kar tausia use di hai

wagarna KHwab ki muddat to puri ho chuki kab ki

saba KHushbu ko aandhi gard ko aage baDhati hai

yahan sab fikr phailate hain apne apne maktab ki

hamari kahkashan ke wast mein tarik rauzan hai

isi mein mahw hoti ja rahi hai raushni sab ki

main un se surmai subhon ki tamsilen nichoDunga

lagi hain hath kuchh parchhaiyan bhigi hui shab ki

falak se kaam ke manzar kashid ek roz kar lunga

zamin se aKHz kar lunga fazaen apne matlab ki

milengi do tamannaen to hasil kuchh naya hoga

ki ajza se alag hoti hai KHasiyyat murakkab ki

hamara zauq-e-naqqashi nahin hai aaj ka pyare

zaban tashkil ke ghaaron mein thi ye lahr hai tab ki

kahin zarre ko apni mauj mein uDta hua dekho

to shayad tum samajh pao hayat aazad-mashrab ki

nahin malum kis shamsi faza ke pas se guzra

chamak baDhne lagi imkan ke dum-dar kaukab ki

siyahi phail kar dil se jabin tak aan pahunchi hai

badal di hain musalsal sar-kashi ne suraten sab ki

guzar junhi faramoshi ke dariya se hua mera

wahin apni surahi aab-e-nisyan se labaalab ki