zahr ko mai na kahun mai ko gawara na kahun

zahr ko mai na kahūñ mai ko gavārā na kahūñ

raushnī maañg ke maiñ ḳhud ko sitāra na kahūñ

apnī palkoñ pe liye phirtā huuñ chāhat ke sarāb

dil ke sahrā ko samundar kā kināra na kahūñ

hijr ke phuul meñ vo chehra-e-zarrīñ dekhūñ

vasl ke ḳhvāb ko milne kā ishāra na kahūñ

marte marte bhī ye tahrīr amānat merī

maut ke ba.ad bhī jiine ko ḳhasāra na kahūñ

apnī takmīl ke har naqsh meñ dekhūñ us ko

arsa-e-dahr ko hasrat kā nazāra na kahūñ

hashr se pahle mire hashr kī tasvīr na ban

harf-e-āḳhir ko kisī taur dobāra na kahūñ

zindagī jis kī mire dam se ibārat ho 'zafar'

kyuuñ kahe koī use jaan se pyārā na kahūñ

zahr ko mai na kahun mai ko gawara na kahun

raushni mang ke main KHud ko sitara na kahun

apni palkon pe liye phirta hun chahat ke sarab

dil ke sahra ko samundar ka kinara na kahun

hijr ke phul mein wo chehra-e-zarrin dekhun

wasl ke KHwab ko milne ka ishaara na kahun

marte marte bhi ye tahrir amanat meri

maut ke baad bhi jine ko KHasara na kahun

apni takmil ke har naqsh mein dekhun us ko

arsa-e-dahr ko hasrat ka nazara na kahun

hashr se pahle mere hashr ki taswir na ban

harf-e-aKHir ko kisi taur dobara na kahun

zindagi jis ki mere dam se ibarat ho 'zafar'

kyun kahe koi use jaan se pyara na kahun