zaifi is liye mujhko suhani lagti hai

za.īfī is liye mujh ko suhānī lagtī hai

ise kamāne meñ puurī javānī lagtī hai

natīja ye hai ki barsoñ talāsh-e-zāt ke baa'd

vahāñ khaḌā huuñ jahāñ ret paanī lagtī hai

guzar rahā huuñ maiñ ilhām kī aziyyat se

har ek baat hī mujh ko purānī lagtī hai

udaas chehre kī rotī huī hañsī mujh ko

kisī ke hijr kī pahlī nishānī lagtī hai

zamīñ kī ḳhaak to biktī hai kāġhzāt pe aur

bashar kī ḳhaak kī bolī zabānī lagtī hai

maiñ apnā aks kisī aur shai meñ dekhūñgā

ki aa.ine meñ to sūrat purānī lagtī hai

tū mere jism ko chhū kar batā maiñ kaisā huuñ

mujhe to ḳhaak ye sadiyoñ purānī lagtī hai

musībatoñ ke tasalsul ko toḌ detī hai

kabhī kabhī kī ḳhushī nā-gahānī lagtī hai

ye kaisī ḳhaak se tū ne banā diyā hai mujhe

ki saañs lete hue rā.egānī lagtī hai

maiñ raftagāñ kī saqāfat huuñ so mirī hastī

mire hī bachchoñ ko qissa kahānī lagtī hai

kalām kartī hai 'ḳhālid' jab āñsūoñ kī zabāñ

zamīñ kī baat bhī tab āsmānī lagtī hai

zaifi is liye mujh ko suhani lagti hai

ise kamane mein puri jawani lagti hai

natija ye hai ki barson talash-e-zat ke ba'd

wahan khaDa hun jahan ret pani lagti hai

guzar raha hun main ilham ki aziyyat se

har ek baat hi mujh ko purani lagti hai

udas chehre ki roti hui hansi mujh ko

kisi ke hijr ki pahli nishani lagti hai

zamin ki KHak to bikti hai kaghzat pe aur

bashar ki KHak ki boli zabani lagti hai

main apna aks kisi aur shai mein dekhunga

ki aaine mein to surat purani lagti hai

tu mere jism ko chhu kar bata main kaisa hun

mujhe to KHak ye sadiyon purani lagti hai

musibaton ke tasalsul ko toD deti hai

kabhi kabhi ki KHushi na-gahani lagti hai

ye kaisi KHak se tu ne bana diya hai mujhe

ki sans lete hue raegani lagti hai

main raftagan ki saqafat hun so meri hasti

mere hi bachchon ko qissa kahani lagti hai

kalam karti hai 'KHalid' jab aansuon ki zaban

zamin ki baat bhi tab aasmani lagti hai