zaKHm aisa hai dikhane se hawa lag jae

zaḳhm aisā hai dikhāne se havā lag jaa.e

tū duā kar ki mujhe koī duā lag jaa.e

ham se mastoñ pe har ik rang sivā khultā hai

ain mumkin hai añdherā bhī diyā lag jaa.e

sabzagī ho to purānā bhī ġhanīmat hai mujhe

dil kī vīrānī meñ ik rog harā lag jaa.e

sher se ishq agar kār-e-havas jaisā ho

itne achchhe se kareñ sab ko burā lag jaa.e

uuñT bhī jaise udāsī kā hunar jānte haiñ

bhūke pyāse hoñ magar dasht bhalā lag jaa.e

dil lagāne se bahalne kā nahīñ hai 'rāshid'

aur vo dil ki jise ishq-e-ḳhudā lag jaa.e

zaKHm aisa hai dikhane se hawa lag jae

tu dua kar ki mujhe koi dua lag jae

hum se maston pe har ek rang siwa khulta hai

ain mumkin hai andhera bhi diya lag jae

sabzagi ho to purana bhi ghanimat hai mujhe

dil ki virani mein ek rog hara lag jae

sher se ishq agar kar-e-hawas jaisa ho

itne achchhe se karen sab ko bura lag jae

unT bhi jaise udasi ka hunar jaante hain

bhuke pyase hon magar dasht bhala lag jae

dil lagane se bahalne ka nahin hai 'rashid'

aur wo dil ki jise ishq-e-KHuda lag jae