zaKHm bhi taza tha aur us pe hawa bhi taza

zaḳhm bhī taaza thā aur us pe havā bhī taaza

dil ne rakkhā thā magar raḳhsh-e-duā bhī taaza

tar-ba-tar hai mire hāthoñ meñ vahī jāmunī rañg

tum ne pūchhā thā ki hotī hai ghaTā bhī taaza

ab talak hai vahī jaltā huā sahrā vahī maiñ

ab talak hai tapish-e-shauq-e-nidā bhī taaza

kis bahāne se tujhe bhuul rahūñ aur ḳhush huuñ

phir banā legā ye dil ek ḳhudā bhī taaza

kis bahāne se maiñ jāgūñ tujhe DhūñDūñ ab ke

ab to is sahn meñ Thahre na havā bhī taaza

aa.ina māñgtā rahtā hai vahī aks tirā

aañkh rakhtī hai tirā rañg-e-qabā bhī taaza

bas bahut hausla rakhne kī kahānī kah lī

raat ko phuul masaltī hai havā bhī taaza

zaKHm bhi taza tha aur us pe hawa bhi taza

dil ne rakkha tha magar raKHsh-e-dua bhi taza

tar-ba-tar hai mere hathon mein wahi jamuni rang

tum ne puchha tha ki hoti hai ghaTa bhi taza

ab talak hai wahi jalta hua sahra wahi main

ab talak hai tapish-e-shauq-e-nida bhi taza

kis bahane se tujhe bhul rahun aur KHush hun

phir bana lega ye dil ek KHuda bhi taza

kis bahane se main jagun tujhe DhunDun ab ke

ab to is sahn mein Thahre na hawa bhi taza

aaina mangta rahta hai wahi aks tera

aankh rakhti hai tera rang-e-qaba bhi taza

bas bahut hausla rakhne ki kahani kah li

raat ko phul masalti hai hawa bhi taza