zaKHm-e-dil jab bhi mahakta hai bhala lagta hai

zaḳhm-e-dil jab bhī mahaktā hai bhalā lagtā hai

silsila 'ahd-e-guzishta hī se jā lagtā hai

ek hī shaḳhs ne ik vaar kiyā thā lekin

rang har shaḳhs ke chehre kā uḌā lagtā hai

mujh ko mā'lūm na thā aise bhī din ā.eñge

koī sach bol rahā ho to burā lagtā hai

apne ahbāb se kuchh aisī banī hai ki hameñ

koī but koī sanam koī ḳhudā lagtā hai

har nayā chehra na.ī baat nayā afsāna

jo kisī ne na kahā aur na sunā lagtā hai

zehn meñ aate haiñ insāñ kī udāsī ke ḳhayāl

jab bhī pahlū mirā bistar se zarā lagtā hai

kaun kis haal meñ kis fikr meñ kis soch meñ hai

ab na chehroñ se na bātoñ se pata lagtā hai

ġhaur se dekhiye 'iqbāl-umar’ kā chehra

rāt-bhar chāñd sitāroñ se laḌā lagtā hai

zaKHm-e-dil jab bhi mahakta hai bhala lagta hai

silsila 'ahd-e-guzishta hi se ja lagta hai

ek hi shaKHs ne ek war kiya tha lekin

rang har shaKHs ke chehre ka uDa lagta hai

mujh ko ma'lum na tha aise bhi din aaenge

koi sach bol raha ho to bura lagta hai

apne ahbab se kuchh aisi bani hai ki hamein

koi but koi sanam koi KHuda lagta hai

har naya chehra nai baat naya afsana

jo kisi ne na kaha aur na suna lagta hai

zehn mein aate hain insan ki udasi ke KHayal

jab bhi pahlu mera bistar se zara lagta hai

kaun kis haal mein kis fikr mein kis soch mein hai

ab na chehron se na baaton se pata lagta hai

ghaur se dekhiye 'iqbaal-umar’ ka chehra

raat-bhar chand sitaron se laDa lagta hai