zaKHm-e-hasti kisi marham se bhi achchha na hua

zaḳhm-e-hastī kisī marham se bhī achchhā na huā

kisī sūrat se ilāj-e-ġham-e-fardā na huā

mere jazbāt ham-āhang-e-taqaddus hī rahe

ya.anī kirdār kā dāman kabhī mailā na huā

ghar meñ ik peḌ lagāyā thā zamāna guzrā

lekin afsos mayassar kabhī saayā na huā

raat to guzrī magar sub.h numāyāñ na huī

vo bhī din the ki kabhī ghar meñ añdherā na huā

haañ ba-zāhir to rahe anjuman-ārā ham log

par haqīqat meñ koī ham se shanāsā na huā

kis tarah phir koī ummīd-e-karam ho dil meñ

jabki andāz-e-sitam hausla-afzā na huā

fā.eda kyā hai havāoñ se ulajhne meñ 'ziyā'

jab diyā jaltā rahā aur ujālā na huā

zaKHm-e-hasti kisi marham se bhi achchha na hua

kisi surat se ilaj-e-gham-e-farda na hua

mere jazbaat ham-ahang-e-taqaddus hi rahe

yani kirdar ka daman kabhi maila na hua

ghar mein ek peD lagaya tha zamana guzra

lekin afsos mayassar kabhi saya na hua

raat to guzri magar subh numayan na hui

wo bhi din the ki kabhi ghar mein andhera na hua

han ba-zahir to rahe anjuman-ara hum log

par haqiqat mein koi hum se shanasa na hua

kis tarah phir koi ummid-e-karam ho dil mein

jabki andaz-e-sitam hausla-afza na hua

faeda kya hai hawaon se ulajhne mein 'ziya'

jab diya jalta raha aur ujala na hua