zaKHm-e-jigar ko dast-e-jarahat se puchhiye

zaḳhm-e-jigar ko dast-e-jarāhat se pūchhiye

jo rah ga.ī diloñ meñ vo hasrat se pūchhiye

jāñ-dādgān-e-aish kā anjām kyā huā

āvārgān-e-kūcha-e-vahshat se pūchhiye

maiñ kho gayā huuñ apnī zarūrat kī bhiiḌ meñ

maiñ kyā huuñ mujh ko merī zarūrat se pūchhiye

afsos hai mujhe mirī ġhairat kī maut par

kyuuñ kī hai ḳhud-kushī mirī ġhurbat se pūchhiye

ham kyuuñ havas-parastī kā ilzām deñ use

sab aaj apnī apnī mohabbat se pūchhiye

kahte haiñ kis ko hashr qayāmat hai kis kā naam

ham-sakinān-e-shahr-e-qayāmat se pūchhiye

khulte kahāñ haiñ sab pe ye asrār harf ke

ramz-e-suḳhan ko ahl-e-farāsat se pūchhiye

kyuuñ vo zabāñ-darāz bhī ḳhāmosh ho gayā

'shāhid'-kamāl us kī ra.ūnat se pūchhiye

zaKHm-e-jigar ko dast-e-jarahat se puchhiye

jo rah gai dilon mein wo hasrat se puchhiye

jaan-dadgan-e-aish ka anjam kya hua

aawargan-e-kucha-e-wahshat se puchhiye

main kho gaya hun apni zarurat ki bhiD mein

main kya hun mujh ko meri zarurat se puchhiye

afsos hai mujhe meri ghairat ki maut par

kyun ki hai KHud-kushi meri ghurbat se puchhiye

hum kyun hawas-parasti ka ilzam den use

sab aaj apni apni mohabbat se puchhiye

kahte hain kis ko hashr qayamat hai kis ka nam

ham-sakinan-e-shahr-e-qayamat se puchhiye

khulte kahan hain sab pe ye asrar harf ke

ramz-e-suKHan ko ahl-e-farasat se puchhiye

kyun wo zaban-daraaz bhi KHamosh ho gaya

'shahid'-kamal us ki raunat se puchhiye