zaKHm-e-paikan-e-sitam laeq-e-izhaar nahin

zaḳhm-e-paikān-e-sitam lā.eq-e-iz.hār nahīñ

ham ko manzūr ilāj-e-dil-e-bīmār nahīñ

dil mirā dekh ke kahte haiñ ki darkār nahīñ

ye bhī ik husn-e-talab hai ki talabgār nahīñ

ik vafā hai ki unheñ yaad dilātī hai mirī

ik yahī baat hai jis se unheñ inkār nahīñ

mā.il-e-shauq-e-asīrī hai rihā.ī kyā hai

vo bhī āzād nahīñ hai jo giraftār nahīñ

be-niyāzī kī ajab shaan hai allāh allāh

us kī duniyā hai jo duniyā kā talabgār nahīñ

qaid-e-hastī se rihā hotā hai terā vahshī

saañs zanjīr hai us kā bhī ravādār nahīñ

ātish-e-ishq meñ jalne ko huā huuñ paidā

ek zarra bhī mirī ḳhaak kā bekār nahīñ

chashm-e-sāqī ke ishāroñ pe nigāheñ rakkhe

mai-kade vāloñ meñ itnā koī hushiyār nahīñ

band kī aañkh to phir ham haiñ na duniyā hai 'shamīm'

safar-e-manzil-e-hastī koī dushvār nahīñ

zaKHm-e-paikan-e-sitam laeq-e-izhaar nahin

hum ko manzur ilaj-e-dil-e-bimar nahin

dil mera dekh ke kahte hain ki darkar nahin

ye bhi ek husn-e-talab hai ki talabgar nahin

ek wafa hai ki unhen yaad dilati hai meri

ek yahi baat hai jis se unhen inkar nahin

mail-e-shauq-e-asiri hai rihai kya hai

wo bhi aazad nahin hai jo giraftar nahin

be-niyazi ki ajab shan hai allah allah

us ki duniya hai jo duniya ka talabgar nahin

qaid-e-hasti se riha hota hai tera wahshi

sans zanjir hai us ka bhi rawadar nahin

aatish-e-ishq mein jalne ko hua hun paida

ek zarra bhi meri KHak ka bekar nahin

chashm-e-saqi ke ishaaron pe nigahen rakkhe

mai-kade walon mein itna koi hushiyar nahin

band ki aankh to phir hum hain na duniya hai 'shamim'

safar-e-manzil-e-hasti koi dushwar nahin