zaKHm-e-tanhai mila ishq mein ruswai bhi

zaḳhm-e-tanhā.ī milā ishq meñ rusvā.ī bhī

phir bhī kuchh kam na huī ishq kī gahrā.ī bhī

aaj hañs hañs ke jo ġhairoñ se milā kartā hai

thā vahī shaḳhs kabhī merā hī shaidā.ī bhī

jaam āñkhoñ ke vo hoñToñ kī gulābī kaliyāñ

aur yaad aatī hai us kī mujhe añgḌā.ī bhī

bad-gumāñ jis se kiyā kartā hai aksar mujh ko

hai usī chāñd kā vo shaḳhs tamannā.ī bhī

phir se dastak dar-e-dil par ye bhalā kaun aayā

nahīñ tasvīr to pahlī abhī dhuñdlā.ī bhī

merī aadat hai ki har ik se milā kartā huuñ

yuuñ zarūrī to nahīñ sab se shanāsā.ī bhī

jis se lagtā thā bahut Dar mujhe pahle 'arshad'

raas aatī hai mujhe ab vahī tanhā.ī bhī

zaKHm-e-tanhai mila ishq mein ruswai bhi

phir bhi kuchh kam na hui ishq ki gahrai bhi

aaj hans hans ke jo ghairon se mila karta hai

tha wahi shaKHs kabhi mera hi shaidai bhi

jam aankhon ke wo honTon ki gulabi kaliyan

aur yaad aati hai us ki mujhe angDai bhi

bad-guman jis se kiya karta hai aksar mujh ko

hai usi chand ka wo shaKHs tamannai bhi

phir se dastak dar-e-dil par ye bhala kaun aaya

nahin taswir to pahli abhi dhundlai bhi

meri aadat hai ki har ek se mila karta hun

yun zaruri to nahin sab se shanasai bhi

jis se lagta tha bahut Dar mujhe pahle 'arshad'

ras aati hai mujhe ab wahi tanhai bhi