zaKHm hai sina abhi talwar hai ehsas abhi

zaḳhm hai siina abhī talvār hai ehsās abhī

kuchh na kuchh jiine kā sarmāya hai mere paas abhī

saañs roke sun rahā hai vaqt un kā faisla

uThtī jhuktī vo nigāheñ aas abhī haiñ yaas abhī

barf kī sil hai kabhī dil aur kabhī sho.ale kī lau

is bayābāñ ko koī mausam na aaya raas abhī

had se baḌh jaa.e to phir dariyā kī kuchh hastī nahīñ

sāhil-e-mamnūa par dam toḌtī hai pyaas abhī

shahr-e-jāñ terī taraf ab bhī khiñchā jaatā hai dil

terī galiyoñ meñ hai agle daur kī bū-bās abhī

gūñjtī hai dil meñ ab bhī koī gum-gashta sadā

ham ko 'qaisī' hai shikast-e-ārzū kā paas abhī

zaKHm hai sina abhi talwar hai ehsas abhi

kuchh na kuchh jine ka sarmaya hai mere pas abhi

sans roke sun raha hai waqt un ka faisla

uThti jhukti wo nigahen aas abhi hain yas abhi

barf ki sil hai kabhi dil aur kabhi shoale ki lau

is bayaban ko koi mausam na aaya ras abhi

had se baDh jae to phir dariya ki kuchh hasti nahin

sahil-e-mamnua par dam toDti hai pyas abhi

shahr-e-jaan teri taraf ab bhi khincha jata hai dil

teri galiyon mein hai agle daur ki bu-bas abhi

gunjti hai dil mein ab bhi koi gum-gashta sada

hum ko 'qaisi' hai shikast-e-arzu ka pas abhi