zaKHm ka indimal hote hue

zaḳhm kā indimāl hote hue

maiñ ne dekhā kamāl hote hue

hijr kī dhuup kyuuñ nahīñ Dhaltī

jashn-e-shām-e-visāl hote hue

de ga.ī mustaqil ḳhalish dil ko

aarzū pā.emāl hote hue

log jiite haiñ jiinā chāhte haiñ

zindagānī vabāl hote hue

kis qadar iḳhtilāf kartā hai

vo mirā ham-ḳhayāl hote hue

pa-e-ilzām aa rukīñ mujh par

saarī āñkheñ savāl hote hue

aaj bhī log ishq karte haiñ

sāmne kī misāl hote hue

ḳhud se hañs kar na mil sake 'ahmad'

ḳhush-suḳhan ḳhush-ḳhisāl hote hue

zaKHm ka indimal hote hue

main ne dekha kamal hote hue

hijr ki dhup kyun nahin Dhalti

jashn-e-sham-e-visal hote hue

de gai mustaqil KHalish dil ko

aarzu paemal hote hue

log jite hain jina chahte hain

zindagani wabaal hote hue

kis qadar iKHtilaf karta hai

wo mera ham-KHayal hote hue

pa-e-ilzam aa rukin mujh par

sari aankhen sawal hote hue

aaj bhi log ishq karte hain

samne ki misal hote hue

KHud se hans kar na mil sake 'ahmad'

KHush-suKHan KHush-KHisal hote hue