zaKHm kya ubhre hamare dil mein un ke tir ke

zaḳhm kyā ubhre hamāre dil meñ un ke tiir ke

gul khile goyā ki ḳhvāb-e-ishq kī ta.abīr ke

pāsbāñ ne ġham diyā aur ham-damoñ ne jaan lī

aaj qaa.il ho ga.e ham gardish-e-taqdīr ke

ḳhud likhī hai ḳhūn-e-dil se ishq kī har dāstāñ

zer-e-ehsāñ maiñ nahīñ huuñ kātib-e-taqdīr ke

rakh diyā hai likhne vaale ne kaleja chiir kar

hai musannif munkashif har lafz meñ tahrīr ke

maiñ ne jab māyūs ho kar hoñT apne sī liye

phir ho kyuuñ mushtāq itne tum merī taqrīr ke

phir vahī saudā vahī vahshat vahī tarz-e-jūn.un

haiñ nishāñ maujūd saare ishq kī tāsīr ke

justujū-e-dīd meñ phirte haiñ sar-garda mudām

har qadam par haiñ muqābil aap kī tasvīr ke

be-kasoñ ma.asūm kī mushkil-kushā.ī kījiye

chhūTnā chakkar se hai gar āsmān-e-pīr ke

ḳhidmat-e-har-mustahiq vo kār-gar tadbīr hai

qufl khul jaate haiñ jis se bandish-e-taqdīr ke

dekhte haiñ dūsroñ kī aañkh ke til meñ bhī aib

be-ḳhabar haiñ lekin apnī aañkh ke shahtīr ke

tum farā.ez-mansabī anjām do 'rahbar' faqat

mat paḌo jhagḌe meñ tum taqdīr-o-tadbīr ke

zaKHm kya ubhre hamare dil mein un ke tir ke

gul khile goya ki KHwab-e-ishq ki tabir ke

pasban ne gham diya aur ham-damon ne jaan li

aaj qail ho gae hum gardish-e-taqdir ke

KHud likhi hai KHun-e-dil se ishq ki har dastan

zer-e-ehsan main nahin hun katib-e-taqdir ke

rakh diya hai likhne wale ne kaleja chir kar

hai musannif munkashif har lafz mein tahrir ke

main ne jab mayus ho kar honT apne si liye

phir ho kyun mushtaq itne tum meri taqrir ke

phir wahi sauda wahi wahshat wahi tarz-e-junun

hain nishan maujud sare ishq ki tasir ke

justuju-e-did mein phirte hain sar-garda mudam

har qadam par hain muqabil aap ki taswir ke

be-kason masum ki mushkil-kushai kijiye

chhuTna chakkar se hai gar aasman-e-pir ke

KHidmat-e-har-mustahiq wo kar-gar tadbir hai

qufl khul jate hain jis se bandish-e-taqdir ke

dekhte hain dusron ki aankh ke til mein bhi aib

be-KHabar hain lekin apni aankh ke shahtir ke

tum faraez-mansabi anjam do 'rahbar' faqat

mat paDo jhagDe mein tum taqdir-o-tadbir ke