zaKHm raazi rahe nashtar ki pazirai ko

zaḳhm raazī rahe nashtar kī pazīrā.ī ko

aap aa.e hī nahīñ kār-e-masīhā.ī ko

fahm-e-hastī na kahīñ vahm-o-gumāñ ho jaa.e

ruḳh se parda jo uThā deñ vo shanāsā.ī ko

hosh-mandī kā taqāzā hai to phir yuuñ kiije

aap āñkhoñ se churā lījiye bīnā.ī ko

tujh pe tuf hai ki tujhe husn kā 'irfān nahīñ

tū ne āvāra samajh rakkhā hai lailā.ī ko

sozan-o-ḳhār se vābasta hai har resha-e-dil

'ishq ik surḳh qabā māñge hai zebā.ī ko

dāman-e-ḳhār se lipTī haiñ hazāroñ kaliyāñ

kuchh tahaffuz bhī yahāñ chāhiye rā'nā.ī ko

silvaToñ se mire bistar kī 'ayāñ ho jaatī

TūTne dete agar ḳhvāb meñ añgḌā.ī ko

saath khelī thī kabhī āñkh-micholī ham ne

aaj bhī DhūñD rahe haiñ usī añgnā.ī ko

apnī sūrat meñ chhupā rakkhī hai 'maḳhfī' sūrat

aa.ina qaid kiye baiThā hai harjā.ī ko

zaKHm raazi rahe nashtar ki pazirai ko

aap aae hi nahin kar-e-masihai ko

fahm-e-hasti na kahin wahm-o-guman ho jae

ruKH se parda jo uTha den wo shanasai ko

hosh-mandi ka taqaza hai to phir yun kije

aap aankhon se chura lijiye binai ko

tujh pe tuf hai ki tujhe husn ka 'irfan nahin

tu ne aawara samajh rakkha hai lailai ko

sozan-o-KHar se wabasta hai har resha-e-dil

'ishq ek surKH qaba mange hai zebai ko

daman-e-KHar se lipTi hain hazaron kaliyan

kuchh tahaffuz bhi yahan chahiye ra'nai ko

silwaTon se mere bistar ki 'ayan ho jati

TuTne dete agar KHwab mein angDai ko

sath kheli thi kabhi aankh-micholi hum ne

aaj bhi DhunD rahe hain usi angnai ko

apni surat mein chhupa rakkhi hai 'maKHfi' surat

aaina qaid kiye baiTha hai harjai ko