zaKHmon ki aur chhaalon ki bhi anjuman rahe

zaḳhmoñ kī aur chhāloñ kī bhī anjuman rahe

talvoñ meñ nok-e-ḳhār-e-safar kī chubhan rahe

ye kyā huā ki chaar qadam chal ke mil ga.ī

manzil mile to paañv meñ kuchh to thakan rahe

dushman kā koī tiir na aaya hamārī samt

jab tak saroñ se bāñdhe hue ham kafan rahe

zindoñ ke jism ke liye rakh do na.e libās

mere badan pe koī purānā kafan rahe

nikle jo tiir jism se mahsūs hī na ho

banda ḳhudā ke sāmne aisā magan rahe

maz.hab pe harf aa.e to lāzim hai ehtijāj

lekin is ehtijāj meñ shā.ista-pan rahe

īmāñ pe baat aa.ī to sochā nahīñ kabhī

tan se judā ho sar ki ye baaqī badan rahe

duniyā-e-nā-tarāsh ko is se ġharaz nahīñ

dāman pe koī daaġh lage yā shikan rahe

TukḌoñ meñ aur firqoñ meñ baTne lagā vatan

kis ko pata hai kal ko ye kaisā vatan rahe

sho.arā-o-sāma.īn kī bhī bazm-e-sher meñ

'ahsan' ye aarzū hai koī gul-badan rahe

zaKHmon ki aur chhaalon ki bhi anjuman rahe

talwon mein nok-e-KHar-e-safar ki chubhan rahe

ye kya hua ki chaar qadam chal ke mil gai

manzil mile to panw mein kuchh to thakan rahe

dushman ka koi tir na aaya hamari samt

jab tak saron se bandhe hue hum kafan rahe

zindon ke jism ke liye rakh do nae libas

mere badan pe koi purana kafan rahe

nikle jo tir jism se mahsus hi na ho

banda KHuda ke samne aisa magan rahe

mazhab pe harf aae to lazim hai ehtijaj

lekin is ehtijaj mein shaista-pan rahe

iman pe baat aai to socha nahin kabhi

tan se juda ho sar ki ye baqi badan rahe

duniya-e-na-tarash ko is se gharaz nahin

daman pe koi dagh lage ya shikan rahe

TukDon mein aur firqon mein baTne laga watan

kis ko pata hai kal ko ye kaisa watan rahe

shoara-o-samain ki bhi bazm-e-sher mein

'ahsan' ye aarzu hai koi gul-badan rahe