zaKHmon ko mere rang hina de gai saba

zaḳhmoñ ko mere rañg hinā de ga.ī sabā

chāhā thā kyā bahār meñ kyā de ga.ī sabā

parvāz kar rahī hai ḳhalāoñ meñ ruuh bhī

apne marīz-e-ġham ko shifā de ga.ī sabā

dasht-e-junūñ ko gard uḌī aur jam ga.ī

uryāñ thā merā jism qabā de ga.ī sabā

dil ko uḌā ke le ga.ī mānind-e-bū-e-gul

kāñToñ pe loTne kī sazā de ga.ī sabā

ye barq ye havādis-e-daurāñ fuzūl haiñ

merī fanā ko rañg-e-baqā de ga.ī sabā

TuuTā na phir bhī us ke ḳhayāloñ kā silsila

dil ke qarīb aa ke sadā de ga.ī sabā

'sailānī' us bahār meñ jaate hue hameñ

murjhā.e gul ġhamoñ kī ridā de ga.ī sabā

zaKHmon ko mere rang hina de gai saba

chaha tha kya bahaar mein kya de gai saba

parwaz kar rahi hai KHalaon mein ruh bhi

apne mariz-e-gham ko shifa de gai saba

dasht-e-junun ko gard uDi aur jam gai

uryan tha mera jism qaba de gai saba

dil ko uDa ke le gai manind-e-bu-e-gul

kanTon pe loTne ki saza de gai saba

ye barq ye hawadis-e-dauran fuzul hain

meri fana ko rang-e-baqa de gai saba

TuTa na phir bhi us ke KHayalon ka silsila

dil ke qarib aa ke sada de gai saba

'sailani' us bahaar mein jate hue hamein

murjhae gul ghamon ki rida de gai saba