zamana aankh se ojhal makan samne hai

zamāna aañkh se ojhal makān sāmne hai

chhipī huī hai haqīqat gumān sāmne hai

nigāh uljhī huī hai vahīñ magar dil ke

khulī zamīn khulā āsmān sāmne hai

khaḌā hai taan ke vo abrūoñ kī shamshīreñ

idhar ye jaan mirī nā-tavān sāmne hai

karūñgā roze kā iz.hār kis tarah tum par

namāz kā to jabīñ par nishān sāmne hai

jhukā.ūñ sar to zamīñ khīñchtī hai sū-e-patāl

uThā.ūñ sar ko to saarā jahān sāmne hai

rukā huā vo koī kārvān sāmne hai

vo chal ke Thahr gayā hai chaTān sāmne hai

mire vajūd ko jumbish kā iḳhtiyār nahīñ

tumhārī āñkhoñ kā ā.īna-dān sāmne hai

maiñ ishtihā kī aziyyat meñ huuñ na khīñch mujhe

abhī hai tuur bahut duur naan sāmne hai

zamana aankh se ojhal makan samne hai

chhipi hui hai haqiqat guman samne hai

nigah uljhi hui hai wahin magar dil ke

khuli zamin khula aasman samne hai

khaDa hai tan ke wo abruon ki shamshiren

idhar ye jaan meri na-tawan samne hai

karunga roze ka izhaar kis tarah tum par

namaz ka to jabin par nishan samne hai

jhukaun sar to zamin khinchti hai su-e-patal

uThaun sar ko to sara jahan samne hai

ruka hua wo koi karwan samne hai

wo chal ke Thahr gaya hai chaTan samne hai

mere wajud ko jumbish ka iKHtiyar nahin

tumhaari aankhon ka aaina-dan samne hai

main ishtiha ki aziyyat mein hun na khinch mujhe

abhi hai tur bahut dur nan samne hai