zamana ab nae andaz se bedar hai saqi

zamāna ab na.e andāz se bedār hai saaqī

na.e qātil na.e maqtal na.ī ab daar hai saaqī

zarā sī buuñd shabnam kī kahāñ bekār hai saaqī

amīn-e-rang-o-bū hai raunaq-e-gulzār hai saaqī

nahīñ koī harīf-e-shoḳhī-e-afkār hai saaqī

yahāñ fikr-o-nazar kā hausla bekār hai saaqī

khiñchī jis ke lahū se mai usī se aar hai saaqī

uThā letā hai jo sāġhar vahī haqdār hai saaqī

yahāñ baiThe haram meñ ḳhvāb-e-jannat kab talak dekheñ

chhalaktī mai-kade meñ daulat-e-bedār hai saaqī

huī raunaq mire zulmat-kade kī sang-bārī se

sharār-e-sang se raushan dar-o-dīvār hai saaqī

nizām-e-kohna pe ye takiya kaisā be-ḳhabar kyoñ ho

bacho is se ye ik girtī huī dīvār hai saaqī

naqīb-e-daur-e-nau ban kar nayā hai valvala dil kā

jo thā mahkūm ḳhvābīda vo ab bedār hai saaqī

tanaffur kī fazāoñ meñ haTāo jām-o-sāġhar ko

yahāñ tak zindagī se bhī hameñ inkār hai saaqī

tire rindoñ ne lalkārā zamāne ke ḳhudāoñ ko

muqaddar ban ga.ī un kī salīb-o-dār hai saaqī

jise ḳhud manzileñ Thokar lagā kar baḌh ga.iiñ aage

kahāñ soyā huā vo qāfila-sālār hai saaqī

jo sīkhe maut kī āñkhoñ meñ āñkheñ Daal kar jiinā

vahī aurāq par tārīḳh ke bedār hai saaqī

karo tāzīm baḌh kar ilm-o-dānish aur hikmat kī

ki hāsil zindagī kā dīda-e-bedār hai saaqī

uTho gaa.eñ mohabbat aur uḳhuvvat ke na.e naġhme

na.ī sahbā nayā sāġhar nayā gulzār hai saaqī

zamana ab nae andaz se bedar hai saqi

nae qatil nae maqtal nai ab dar hai saqi

zara si bund shabnam ki kahan bekar hai saqi

amin-e-rang-o-bu hai raunaq-e-gulzar hai saqi

nahin koi harif-e-shoKHi-e-afkar hai saqi

yahan fikr-o-nazar ka hausla bekar hai saqi

khinchi jis ke lahu se mai usi se aar hai saqi

uTha leta hai jo saghar wahi haqdar hai saqi

yahan baiThe haram mein KHwab-e-jannat kab talak dekhen

chhalakti mai-kade mein daulat-e-bedar hai saqi

hui raunaq mere zulmat-kade ki sang-bari se

sharar-e-sang se raushan dar-o-diwar hai saqi

nizam-e-kohna pe ye takiya kaisa be-KHabar kyon ho

bacho is se ye ek girti hui diwar hai saqi

naqib-e-daur-e-nau ban kar naya hai walwala dil ka

jo tha mahkum KHwabida wo ab bedar hai saqi

tanaffur ki fazaon mein haTao jam-o-saghar ko

yahan tak zindagi se bhi hamein inkar hai saqi

tere rindon ne lalkara zamane ke KHudaon ko

muqaddar ban gai un ki salib-o-dar hai saqi

jise KHud manzilen Thokar laga kar baDh gain aage

kahan soya hua wo qafila-salar hai saqi

jo sikhe maut ki aankhon mein aankhen Dal kar jina

wahi auraq par tariKH ke bedar hai saqi

karo tazim baDh kar ilm-o-danish aur hikmat ki

ki hasil zindagi ka dida-e-bedar hai saqi

uTho gaen mohabbat aur uKHuwwat ke nae naghme

nai sahba naya saghar naya gulzar hai saqi