zamana de gaya jo zaKHm umr bhar ke liye

zamāna de gayā jo zaḳhm 'umr bhar ke liye

'ilāj us kā thā dushvār chārāgar ke liye

kare jo raah munavvar ye koī shart nahīñ

diyā zarūr vo rakhtā ho apne ghar ke liye

jo ho sake to karo rahm ḳhalq-e-bārī par

yahī hai zād-e-safar āḳhirī safar ke liye

jinheñ talāsh hai manzil kī dhun ke pakke haiñ

ruke raheñge bhalā kab vo rāhbar ke liye

ḳhatā mu'āf jo karte haiñ zarf vaale haiñ

zarā sā shosha hī kaafī hai fitna-gar ke liye

ḳhulūs-o-pyār mohabbat karam ravādārī

shi'ār chāhiye har sāhib-e-nazar ke liye

shu’ūr-o-fikr-o-nazar inkisār aur tadbīr

bahut zarūrī hai har ek chārāgar ke liye

zamana de gaya jo zaKHm 'umr bhar ke liye

'ilaj us ka tha dushwar chaaragar ke liye

kare jo rah munawwar ye koi shart nahin

diya zarur wo rakhta ho apne ghar ke liye

jo ho sake to karo rahm KHalq-e-bari par

yahi hai zad-e-safar aaKHiri safar ke liye

jinhen talash hai manzil ki dhun ke pakke hain

ruke rahenge bhala kab wo rahbar ke liye

KHata mu'af jo karte hain zarf wale hain

zara sa shosha hi kafi hai fitna-gar ke liye

KHulus-o-pyar mohabbat karam rawadari

shi'ar chahiye har sahib-e-nazar ke liye

shu’ur-o-fikr-o-nazar inkisar aur tadbir

bahut zaruri hai har ek chaaragar ke liye