zamana deta hai jis ko waqar ki KHushbu

zamāna detā hai jis ko vaqār kī ḳhushbū

tavāf kartī hai us kā bahār kī ḳhushbū

hamāre hisse meñ aa.ī jo ḳhaar kī ḳhushbū

bahut hī ḳhush thī chaman kī bahār kī ḳhushbū

ḳhulūs-e-dil ke guloñ ke nikhār kī ḳhushbū

vafā ke jism se aatī hai pyaar kī ḳhushbū

chubhā hai us kī hathelī meñ koī ḳhaar zarūr

chaman meñ chīḳh rahī hai bahār kī ḳhushbū

zabān pyaar kī ḳhushbū kī maiñ samajhtā huuñ

mirī zabān samajhtī hai pyaar kī ḳhushbū

sunā rahī hai purānī sharāb kā qissa

dimāġh chaaT rahī hai ḳhumār kī ḳhushbū

tumhāre zehn meñ khilte nahīñ ḳhulūs ke phuul

kahāñ se doge mujhe e.atibār kī ḳhushbū

zabān kaun mohabbat kī boltā hai yahāñ

pasand kis ko hai mere dayār kī ḳhushbū

safar kī saarī thakāvaT 'qamar' maiñ bhuul gayā

pahuñch ke ghar jo milī mujh ko pyaar kī ḳhushbū

zamana deta hai jis ko waqar ki KHushbu

tawaf karti hai us ka bahaar ki KHushbu

hamare hisse mein aai jo KHar ki KHushbu

bahut hi KHush thi chaman ki bahaar ki KHushbu

KHulus-e-dil ke gulon ke nikhaar ki KHushbu

wafa ke jism se aati hai pyar ki KHushbu

chubha hai us ki hatheli mein koi KHar zarur

chaman mein chiKH rahi hai bahaar ki KHushbu

zaban pyar ki KHushbu ki main samajhta hun

meri zaban samajhti hai pyar ki KHushbu

suna rahi hai purani sharab ka qissa

dimagh chaT rahi hai KHumar ki KHushbu

tumhaare zehn mein khilte nahin KHulus ke phul

kahan se doge mujhe eatibar ki KHushbu

zaban kaun mohabbat ki bolta hai yahan

pasand kis ko hai mere dayar ki KHushbu

safar ki sari thakawaT 'qamar' main bhul gaya

pahunch ke ghar jo mili mujh ko pyar ki KHushbu