zamana guzra hai tufan-e-gham uThae hue

zamāna guzrā hai tūfān-e-ġham uThā.e hue

ġhazal ke parde meñ rūdād-e-dil sunā.e hue

hamīñ the jin se gunāh-e-vafā huā sarzad

khaḌe haiñ daar ke saa.e meñ sar jhukā.e hue

hamāre dil ke sabhī raaz faash karte haiñ

jhukī jhukī sī nazar hoñT kapkapā.e hue

hamāre dil ke añdheroñ kā ġham na kar hamdam

hamāre dam se ye raste haiñ jagmagā.e hue

shumār-e-roz-o-shab-o-māh kis ne rakkhā hai

hazāroñ saal hue un ko dil meñ aa.e hue

guzarte rahte haiñ nazroñ se saarī shab 'mumtāz'

hazāroñ qāfile yādoñ ke sar jhukā.e hue

zamana guzra hai tufan-e-gham uThae hue

ghazal ke parde mein rudad-e-dil sunae hue

hamin the jin se gunah-e-wafa hua sarzad

khaDe hain dar ke sae mein sar jhukae hue

hamare dil ke sabhi raaz fash karte hain

jhuki jhuki si nazar honT kapkapae hue

hamare dil ke andheron ka gham na kar hamdam

hamare dam se ye raste hain jagmagae hue

shumar-e-roz-o-shab-o-mah kis ne rakkha hai

hazaron sal hue un ko dil mein aae hue

guzarte rahte hain nazron se sari shab 'mumtaz'

hazaron qafile yaadon ke sar jhukae hue