zamana ho gaya hai KHwab dekhe

zamāna ho gayā hai ḳhvāb dekhe

lahū meñ dard kā shab-tāb dekhe

manāzir ko bahut muddat huī hai

nigāhoñ meñ nayā ik baab dekhe

sitāra shaam ko jab aañkh khole

achānak chāñd ko pāyāb dekhe

vo chingārī sī de qurbat kī mujh ko

to phir sūraj kī āb-o-tāb dekhe

ka.ī rāteñ huiiñ khiḌkī meñ ghar kī

ta'alluq kā nayā mahtāb dekhe

maiñ lafzoñ kī na.ī fasleñ ugā.ūñ

vo sannāToñ ke taaza ḳhvāb dekhe

merī āñkhoñ meñ sāvan rang bhar de

mujhe ai kaash vo sairāb dekhe

na vo āvārgī kā shauq 'ahmad'

na koī dasht ko betāb dekhe

zamana ho gaya hai KHwab dekhe

lahu mein dard ka shab-tab dekhe

manazir ko bahut muddat hui hai

nigahon mein naya ek bab dekhe

sitara sham ko jab aankh khole

achanak chand ko payab dekhe

wo chingari si de qurbat ki mujh ko

to phir suraj ki aab-o-tab dekhe

kai raaten huin khiDki mein ghar ki

ta'alluq ka naya mahtab dekhe

main lafzon ki nai faslen ugaun

wo sannaTon ke taza KHwab dekhe

meri aankhon mein sawan rang bhar de

mujhe ai kash wo sairab dekhe

na wo aawargi ka shauq 'ahmad'

na koi dasht ko betab dekhe