zamana rashk kare wo suKHan ke jauhar khinch

zamāna rashk kare vo suḳhan ke jauhar khīñch

qalam kā haq to adā kar koī to mahshar khīñch

nafas na anjuman-e-ārzū se bāhar khīñch

zamīñ asad kī hai manzar jo khīñch haT kar khīñch

ajiib shakl hai maqtal meñ kyā kiyā jaa.e

har ek shaḳhs kī ḳhvāhish hai tū hī ḳhanjar khīñch

ḳhizāñ to dil ke dikhāne kā ik bahāna hai

maza to jab hai bahāroñ ko apne andar khīñch

ye kapkapāte hue lab koī ilaaj nahīñ

zabāñ ko khol mohabbat kā raaz bāhar khīñch

gunāhgār huuñ mujh ko hai e'tirāf magar

mire ḳhudā mire sar par karam kī chādar khīñch

tirī ġhazal ne tujhe surḳh-rū kiyā 'shāhid'

so tajraboñ ke samundar se yūñhī gauhar khīñch

zamana rashk kare wo suKHan ke jauhar khinch

qalam ka haq to ada kar koi to mahshar khinch

nafas na anjuman-e-arzu se bahar khinch

zamin asad ki hai manzar jo khinch haT kar khinch

ajib shakl hai maqtal mein kya kiya jae

har ek shaKHs ki KHwahish hai tu hi KHanjar khinch

KHizan to dil ke dikhane ka ek bahana hai

maza to jab hai bahaaron ko apne andar khinch

ye kapkapate hue lab koi ilaj nahin

zaban ko khol mohabbat ka raaz bahar khinch

gunahgar hun mujh ko hai e'tiraf magar

mere KHuda mere sar par karam ki chadar khinch

teri ghazal ne tujhe surKH-ru kiya 'shahid'

so tajrabon ke samundar se yunhi gauhar khinch