zamana yaad rakkhega tumhein ye kaam kar jaana

zamāna yaad rakkhegā tumheñ ye kaam kar jaanā

kisī afsurda chehre meñ ḳhushī ke rañg bhar jaanā

kisī bhī hādse par us kī āñkheñ nam nahīñ hotīñ

isī hālat ko kahte haiñ miyāñ ehsās mar jaanā

agar jaanā zarūrī hai to thoḌā muskurā bhī de

mujhe achchhā nahīñ lagtā tirā bā-chashm-e-tar jaanā

abhī bhī vaqt hai baaqī taḌap paidā karo varna

qayāmat kī nishānī hai duāoñ se asar jaanā

shahādat kī jabīñ par aaj bhī raushan hai vo lamha

vo saa.at jis meñ thā shabbīr kā sajde meñ sar jaanā

ka.ī āñkhoñ ke dīpak muntazir haiñ dil kī rāhoñ meñ

mirī āvārgī lāzim hai merā ab to ghar jaanā

anā ko bechnā 'shāyān' zillat kī nishānī hai

anā ko bechne se to kahīñ behtar hai mar jaanā

zamana yaad rakkhega tumhein ye kaam kar jaana

kisi afsurda chehre mein KHushi ke rang bhar jaana

kisi bhi hadse par us ki aankhen nam nahin hotin

isi haalat ko kahte hain miyan ehsas mar jaana

agar jaana zaruri hai to thoDa muskura bhi de

mujhe achchha nahin lagta tera ba-chashm-e-tar jaana

abhi bhi waqt hai baqi taDap paida karo warna

qayamat ki nishani hai duaon se asar jaana

shahadat ki jabin par aaj bhi raushan hai wo lamha

wo saat jis mein tha shabbir ka sajde mein sar jaana

kai aankhon ke dipak muntazir hain dil ki rahon mein

meri aawargi lazim hai mera ab to ghar jaana

ana ko bechna 'shayan' zillat ki nishani hai

ana ko bechne se to kahin behtar hai mar jaana