zamane bhar ko nai tab-o-tab dikha na sake

zamāne bhar ko na.ī tāb-o-tab dikhā na sake

vo shaḳhs kyā jo ġhamoñ meñ bhī muskurā na sake

ham apne shahr meñ rahte haiñ ajnabī kī tarah

magar ye baat kisī ko bhī ham batā na sake

guzarte vaqt kī mānind hai aaj kā insāñ

sadā.eñ de ke use ham kabhī bulā na sake

zarūr ranjish-e-bejā hai aap ko ham se

mile gale se magar dil kabhī milā na sake

tumhāre va.ade hasīñ bhī the dil-fareb bhī the

hamāre ghar se ġharībī magar haTā na sake

jo baḳhshte rahe duniyā ko nuur kī daulat

vo apne ghar meñ koī sham.a tak jalā na sake

rahe haiñ 'gauhar'-e-nāyāb kī tarah lekin

ham apne aap ko showcase meñ sajā na sake

zamane bhar ko nai tab-o-tab dikha na sake

wo shaKHs kya jo ghamon mein bhi muskura na sake

hum apne shahr mein rahte hain ajnabi ki tarah

magar ye baat kisi ko bhi hum bata na sake

guzarte waqt ki manind hai aaj ka insan

sadaen de ke use hum kabhi bula na sake

zarur ranjish-e-beja hai aap ko hum se

mile gale se magar dil kabhi mila na sake

tumhaare wade hasin bhi the dil-fareb bhi the

hamare ghar se gharibi magar haTa na sake

jo baKHshte rahe duniya ko nur ki daulat

wo apne ghar mein koi shama tak jala na sake

rahe hain 'gauhar'-e-nayab ki tarah lekin

hum apne aap ko showcase mein saja na sake