zamane ho gae ummid-war hain hum log

zamāne ho ga.e ummīd-vār haiñ ham log

sitam-kashān-e-ġham-e-rozgār haiñ ham log

junūn kaam na aayā ki saare ḳhvāb-o-ḳhayāl

ulajh ke rah ga.e jin se vo ḳhaar haiñ ham log

jise tajassus-e-sabr-e-gurez-pā kahiye

isī ḳhalish isī ġham kā shikār haiñ ham log

sharāb-e-tajraba-e-talḳh pī chuke haiñ ham

sañbhal ga.e haiñ bahut hoshiyār haiñ ham log

na jaane kab kahāñ le jaa.e kab kahāñ ruk jaa.e

ye raḳhsh-e-umr ki jis par savār haiñ ham log

qasam tasalsul-e-lail-o-nahār kī 'yaktā'

sitam-kashān-e-ġham-e-intizār haiñ ham log

zamane ho gae ummid-war hain hum log

sitam-kashan-e-gham-e-rozgar hain hum log

junun kaam na aaya ki sare KHwab-o-KHayal

ulajh ke rah gae jin se wo KHar hain hum log

jise tajassus-e-sabr-e-gurez-pa kahiye

isi KHalish isi gham ka shikar hain hum log

sharab-e-tajraba-e-talKH pi chuke hain hum

sanbhal gae hain bahut hoshiyar hain hum log

na jaane kab kahan le jae kab kahan ruk jae

ye raKHsh-e-umr ki jis par sawar hain hum log

qasam tasalsul-e-lail-o-nahaar ki 'yakta'

sitam-kashan-e-gham-e-intizar hain hum log