zamane jis qadar ji chahe le le imtihan humse

zamāne jis qadar jī chāhe le le imtihāñ ham se

badal jā.egā to badlī na jā.egī zabāñ ham se

basāyā hai ġhamoñ ne jab se apne ḳhāna-e-dil ko

masarrat ruuTh kar chal dī ḳhudā jaane kahāñ ham se

sunāne ko to ham bhī dāstāñ apnī sunā dete

kareñ kyā pūchhne vaalā to ho koī yahāñ ham se

vo jab se mil ke bichhḌe haiñ to ye mahsūs hotā hai

kisī ne chhīn lī jaise hayāt-e-jāvidāñ ham se

shab-e-furqat basā lete haiñ vo duniyā tasavvur kī

tirī tasvīr tak bhī baat kartī hai jahāñ ham se

qarīb-e-manzil-e-maqsūd phir qismat ne bhaTkāyā

bichhaḌ kar rah ga.e ham kārvāñ se kārvāñ ham se

'sharar' apnā qafas ik din yaqīñ hai gulsitāñ hogā

bahāreñ ḳhud gale milne ko ā.eñgī yahāñ ham se

zamane jis qadar ji chahe le le imtihan hum se

badal jaega to badli na jaegi zaban hum se

basaya hai ghamon ne jab se apne KHana-e-dil ko

masarrat ruTh kar chal di KHuda jaane kahan hum se

sunane ko to hum bhi dastan apni suna dete

karen kya puchhne wala to ho koi yahan hum se

wo jab se mil ke bichhDe hain to ye mahsus hota hai

kisi ne chhin li jaise hayat-e-jawidan hum se

shab-e-furqat basa lete hain wo duniya tasawwur ki

teri taswir tak bhi baat karti hai jahan hum se

qarib-e-manzil-e-maqsud phir qismat ne bhaTkaya

bichhaD kar rah gae hum karwan se karwan hum se

'sharar' apna qafas ek din yaqin hai gulsitan hoga

bahaaren KHud gale milne ko aaengi yahan hum se