zamane ke har ek wahm-o-guman se dur rahta hun

zamāne ke har ik vahm-o-gumāñ se duur rahtā huuñ

maiñ dānista amīr-e-kārvāñ se duur rahtā huuñ

nahīñ ab mujh meñ tāqat hijrateñ bardāsht karne kī

koī aalam bhī ho maiñ imtihāñ se duur rahtā huuñ

bahāreñ bhī ḳhizāñ ke ruup meñ jalva dikhātī haiñ

isī baa.is maiñ sehn-e-gulsitāñ se duur rahtā huuñ

mujhe ye zindagī kī Dor lagtī hai bahut pyārī

tire ḳhud-sāḳhta tīr-o-kamāñ se duur rahtā huuñ

koī roke hai mujh ko terī jānib pesh-qadmī se

zamīñ kā rizq huuñ aur āsmāñ se duur rahtā huuñ

agarche hai hunar kī chāshnī mere rag-o-pai meñ

na jaane kyoñ had-e-kaun-o-makāñ se duur rahtā huuñ

sab us kī guftugū sunñe kā dil meñ shauq rakhte haiñ

magar maiñ huuñ ki us jādū-bayāñ se duur rahtā huuñ

nahīñ chaltī ta.āqub meñ mire ab gardish-e-daurāñ

maiñ 'aḳhtar' halqa-e-āvārgāñ se duur rahtā huuñ

zamane ke har ek wahm-o-guman se dur rahta hun

main danista amir-e-karwan se dur rahta hun

nahin ab mujh mein taqat hijraten bardasht karne ki

koi aalam bhi ho main imtihan se dur rahta hun

bahaaren bhi KHizan ke rup mein jalwa dikhati hain

isi bais main sehn-e-gulsitan se dur rahta hun

mujhe ye zindagi ki Dor lagti hai bahut pyari

tere KHud-saKHta tir-o-kaman se dur rahta hun

koi roke hai mujh ko teri jaanib pesh-qadmi se

zamin ka rizq hun aur aasman se dur rahta hun

agarche hai hunar ki chashni mere rag-o-pai mein

na jaane kyon had-e-kaun-o-makan se dur rahta hun

sab us ki guftugu sunne ka dil mein shauq rakhte hain

magar main hun ki us jadu-bayan se dur rahta hun

nahin chalti taaqub mein mere ab gardish-e-dauran

main 'aKHtar' halqa-e-awargan se dur rahta hun