zamane ke taghaful se jo har lamha bikharti hai

zamāne ke taġhāful se jo har lamha bikhartī hai

sunā hai aap ke dar par vahī qismat sañvartī hai

tasavvur se hī jis ke āj-kal ye ruuh Dartī hai

nazar ke sāmne yā-rab vahī sūrat ubhartī hai

kamī hogī na hargiz āsmāñ tere ḳhazāne meñ

zarā sī chāñdnī gar mere āñgan meñ utartī hai

ka.ī dariyāoñ kā paanī yaqīnan us se kam hogā

musībat jis qadar aañsū mirī āñkhoñ meñ bhartī hai

vahīñ apnī bhī kashtī aa ga.ī tūfāñ kī shiddat se

jahāñ par zindagī barbād ho kar aah bhartī hai

mahakte the mire din raat jis kī mezbānī se

vo ḳhushbū āj-kal jaane kahāñ parvāz kartī hai

sunā.eñ kyā ham apne haal ko bas muḳhtasar 'tashna'

hamārī zindagī bhī āj-kal yūñhī guzartī hai

zamane ke taghaful se jo har lamha bikharti hai

suna hai aap ke dar par wahi qismat sanwarti hai

tasawwur se hi jis ke aaj-kal ye ruh Darti hai

nazar ke samne ya-rab wahi surat ubharti hai

kami hogi na hargiz aasman tere KHazane mein

zara si chandni gar mere aangan mein utarti hai

kai dariyaon ka pani yaqinan us se kam hoga

musibat jis qadar aansu meri aankhon mein bharti hai

wahin apni bhi kashti aa gai tufan ki shiddat se

jahan par zindagi barbaad ho kar aah bharti hai

mahakte the mere din raat jis ki mezbani se

wo KHushbu aaj-kal jaane kahan parwaz karti hai

sunaen kya hum apne haal ko bas muKHtasar 'tashna'

hamari zindagi bhi aaj-kal yunhi guzarti hai