zamane lauT ke aaenge etibar ke bhi

zamāne lauT ke ā.eñge e'tibār ke bhī

janāb miliye kisī din naqāb utaar ke bhī

vo haq hī ham ne jatāyā nahīñ kabhī jānāñ

hamāre haath meñ mausam the iḳhtiyār ke bhī

charāġh ham ne jalā.e nahīñ haiñ ab kī baar

ki mas.ale the havāoñ pe e'tibār ke bhī

ye bāġhbān 'ajab haiñ ḳhizāñ hī likhte haiñ

likhe the apne muqaddar meñ din bahār ke bhī

nadī kahāñ se chalī parbatoñ pe kis se milī

ye raaz dafn hai siine meñ ābshār ke bhī

ab un ko kaun se alqāb se pukārā jaa.e

jo tājdār haiñ saudā diloñ kā haar ke bhī

sunā hai TuuTe hue dil meñ hai tirā maskan

ḳhud apne siine meñ dekhā tujhe pukār ke bhī

ki jāñ-nisāroñ se māñgā hai shahriyat kā subūt

irāde nek nahīñ lagte shahryār ke bhī

sitam to apnī jagah haiñ sitam ke dukh taslīm

uThāne paḌte haiñ ehsān ġham-gusār ke bhī

zamane lauT ke aaenge e'tibar ke bhi

janab miliye kisi din naqab utar ke bhi

wo haq hi hum ne jataya nahin kabhi jaanan

hamare hath mein mausam the iKHtiyar ke bhi

charagh hum ne jalae nahin hain ab ki bar

ki masale the hawaon pe e'tibar ke bhi

ye baghban 'ajab hain KHizan hi likhte hain

likhe the apne muqaddar mein din bahaar ke bhi

nadi kahan se chali parbaton pe kis se mili

ye raaz dafn hai sine mein aabshaar ke bhi

ab un ko kaun se alqab se pukara jae

jo tajdar hain sauda dilon ka haar ke bhi

suna hai TuTe hue dil mein hai tera maskan

KHud apne sine mein dekha tujhe pukar ke bhi

ki jaan-nisaron se manga hai shahriyat ka subut

irade nek nahin lagte shahryar ke bhi

sitam to apni jagah hain sitam ke dukh taslim

uThane paDte hain ehsan gham-gusar ke bhi