zamin apne lahu se aashna hone hi wali hai

zamīñ apne lahū se āshnā hone hī vaalī hai

bahut kuchh ho chukā ab intihā hone hī vaalī hai

savā neze pe sūraj aa gayā ab dekhiye kyā ho

qayāmat ek do pal meñ bapā hone hī vaalī hai

mirī āñkhoñ talak sho.ala lahū kā aan pahuñchā hai

ye talḳhī ab zabāñ kā zā.iqa hone hī vaalī hai

bahut din jāgte ḳhvāboñ ko āñkhoñ se lagāyā hai

ye qurbat kuchh dinoñ tak fāsla hone hī vaalī hai

vahī gandum kā daana hai vahī haiñ is pe tāzīreñ

maiñ Dartā huuñ ki phir mujh se ḳhatā hone hī vaalī hai

yahāñ se rāsta koī kisī jānib nahīñ jaatā

yahīñ se ik safar kī ibtidā hone hī vaalī hai

khule the muddatoñ se be-sabab āñkhoñ ke darvāze

ye bastī aaj kal meñ be-sadā hone hī vaalī hai

mire ghar tak bhī aa pahuñchā hai āḳhir shor galiyoñ kā

ye tanhā.ī mire dil se judā hone hī vaalī hai

ga.e-guzre dinoñ kī dhuul ab āñkhoñ se dho Daalo

koī sūrat kahīñ se rūnumā hone hī vaalī hai

sitāre ḳhāk-e-pā-e-ādmiyat banñe vaale haiñ

ye miTTī ab mire sar kī ridā hone hī vaalī hai

badalne ke liye betāb hai 'shahzād' ye duniyā

ravā jo chiiz thā ab nā-ravā hone hī vaalī hai

zamin apne lahu se aashna hone hi wali hai

bahut kuchh ho chuka ab intiha hone hi wali hai

sawa neze pe suraj aa gaya ab dekhiye kya ho

qayamat ek do pal mein bapa hone hi wali hai

meri aankhon talak shoala lahu ka aan pahuncha hai

ye talKHi ab zaban ka zaiqa hone hi wali hai

bahut din jagte KHwabon ko aankhon se lagaya hai

ye qurbat kuchh dinon tak fasla hone hi wali hai

wahi gandum ka dana hai wahi hain is pe taziren

main Darta hun ki phir mujh se KHata hone hi wali hai

yahan se rasta koi kisi jaanib nahin jata

yahin se ek safar ki ibtida hone hi wali hai

khule the muddaton se be-sabab aankhon ke darwaze

ye basti aaj kal mein be-sada hone hi wali hai

mere ghar tak bhi aa pahuncha hai aaKHir shor galiyon ka

ye tanhai mere dil se juda hone hi wali hai

gae-guzre dinon ki dhul ab aankhon se dho Dalo

koi surat kahin se runuma hone hi wali hai

sitare KHak-e-pa-e-admiyat banne wale hain

ye miTTi ab mere sar ki rida hone hi wali hai

badalne ke liye betab hai 'shahzad' ye duniya

rawa jo chiz tha ab na-rawa hone hi wali hai