zamin dil pe nai khulti hai ada-e-suKHan

zamīn dil pe na.ī khultī hai adā-e-suḳhan

ki ham kuchh aur hī jāneñ haiñ māvārā-e-suḳhan

fasāna-e-dil-o-jāñ kis pe baar hotā hai

magar kabhī to suḳhan chāhiye barā-e-suḳhan

usī pe khulte haiñ ārā.ish-e-ḳhayāl ke dar

hai jis ke aqd-e-irādat meñ dil-rubā-e-suḳhan

tire baġhair bhī ye guftugū mukammal hai

tire baġhair bhī ḳhālī nahīñ sarā-e-suḳhan

saje-sajā.e makāñ pal meñ ho ga.e mismār

bayān-e-dard kī kis tarah taab laa.e suḳhan

ba-juz havā-e-hunar kuchh nahīñ matā-e-hayāt

hamāre ba.ad kaheñge sabhī ki haa.e suḳhan

zamin dil pe nai khulti hai ada-e-suKHan

ki hum kuchh aur hi jaanen hain mawara-e-suKHan

fasana-e-dil-o-jaan kis pe bar hota hai

magar kabhi to suKHan chahiye bara-e-suKHan

usi pe khulte hain aaraish-e-KHayal ke dar

hai jis ke aqd-e-iradat mein dil-ruba-e-suKHan

tere baghair bhi ye guftugu mukammal hai

tere baghair bhi KHali nahin sara-e-suKHan

saje-sajae makan pal mein ho gae mismar

bayan-e-dard ki kis tarah tab lae suKHan

ba-juz hawa-e-hunar kuchh nahin mata-e-hayat

hamare baad kahenge sabhi ki hae suKHan