zamin-e-dil mein mohabbat ki fasl boi gai

zamīn-e-dil meñ mohabbat kī fasl boī ga.ī

so ab kī baar musībat kī fasl boī ga.ī

chaleñ to pairoñ ke chhāle bhī bol uThte haiñ

safar meñ jaise mashaqqat kī fasl boī ga.ī

gilā zamīñ se karūñ kyā ki āsmān pe bhī

mire janam pe shikāyat kī fasl boī ga.ī

tumhārā rizq to aanā hai āsmāñ se magar

mire liye to aziyyat kī fasl boī ga.ī

isī liye to mayassar nahīñ sukūn mujhe

mire vajūd meñ vahshat kī fasl boī ga.ī

ajab nahīñ hai ki jaldī meñ chhoḌ duuñ duniyā

har ek shaḳhs meñ ujlat kī fasl boī ga.ī

tumheñ ḳhabar hai ki ham sāhilī parinde haiñ

hamāre vāste hijrat kī fasl boī ga.ī

uge hue the har ik samt aa.ine 'ahmad'

baḌe yaqīn se hairat kī fasl boī ga.ī

zamin-e-dil mein mohabbat ki fasl boi gai

so ab ki bar musibat ki fasl boi gai

chalen to pairon ke chhaale bhi bol uThte hain

safar mein jaise mashaqqat ki fasl boi gai

gila zamin se karun kya ki aasman pe bhi

mere janam pe shikayat ki fasl boi gai

tumhaara rizq to aana hai aasman se magar

mere liye to aziyyat ki fasl boi gai

isi liye to mayassar nahin sukun mujhe

mere wajud mein wahshat ki fasl boi gai

ajab nahin hai ki jaldi mein chhoD dun duniya

har ek shaKHs mein ujlat ki fasl boi gai

tumhein KHabar hai ki hum sahili parinde hain

hamare waste hijrat ki fasl boi gai

uge hue the har ek samt aaine 'ahmad'

baDe yaqin se hairat ki fasl boi gai