zamin hasb-e-zarurat ugai jati hai

zamīn hasb-e-zarūrat ugaa.ī jaatī hai

phir ek sāñche meñ ḳhilqat banā.ī jaatī hai

ḳhabar meñ haiñ jo ka.ī zar-ḳharīd qissa-go

hameñ unhīñ kī kahānī sunā.ī jaatī hai

hamārī bazm meñ jalte nahīñ charāġh ke saath

yahāñ charāġh kī dahshat jalā.ī jaatī hai

tamām raat kā jaagā huuñ mā'zarat mire dost

burā na maan agar niiñd aa.ī jaatī hai

hamāre jaam meñ ilzām ke sivā nahīñ kuchh

hameñ sharāb kī tohmat pilā.ī jaatī hai

maiñ ḳhud se jang kā e'lān karne vaalā huuñ

jo haarī jaatī nahīñ hai harā.ī jaatī hai

hamāre 'ahd kā sarmāya haiñ ye tālib-e-‘ilm

inheñ kitāb se nafrat sikhā.ī jaatī hai

zamīn par hai tamām andhe 'āshiqoñ kā hujūm

yahāñ vafā bhī nahīñ āzmā.ī jaatī hai

ye kaise ḳhvāb kī takmīl meñ lagā hai jahāñ

ki zahr de ke mohabbat sulā.ī jaatī hai

zamin hasb-e-zarurat ugai jati hai

phir ek sanche mein KHilqat banai jati hai

KHabar mein hain jo kai zar-KHarid qissa-go

hamein unhin ki kahani sunai jati hai

hamari bazm mein jalte nahin charagh ke sath

yahan charagh ki dahshat jalai jati hai

tamam raat ka jaga hun ma'zarat mere dost

bura na man agar nind aai jati hai

hamare jam mein ilzam ke siwa nahin kuchh

hamein sharab ki tohmat pilai jati hai

main KHud se jang ka e'lan karne wala hun

jo haari jati nahin hai harai jati hai

hamare 'ahd ka sarmaya hain ye talib-e-‘ilm

inhen kitab se nafrat sikhai jati hai

zamin par hai tamam andhe 'ashiqon ka hujum

yahan wafa bhi nahin aazmai jati hai

ye kaise KHwab ki takmil mein laga hai jahan

ki zahr de ke mohabbat sulai jati hai