zamin ka rizq hai ya su-e-asman gai hai

zamīñ kā rizq hai yā sū-e-āsmāñ ga.ī hai

hamāre gumbad-e-dil kī sadā kahāñ ga.ī hai

mile kahāñ se ki ab rā.egāñ na hone duuñ

ye zindagī to mirī saḳht rā.egāñ ga.ī hai

maiñ dil hī dil meñ nasheman kī ḳhair māñgtā huuñ

chaman kī samt sabā yuuñ to mehrbāñ ga.ī hai

gumāñ yahī thā ki ab vo shabīh-e-ḳhūn-ālūd

chalī ga.ī tah-e-dil se magar kahāñ ga.ī hai

ye sochtā huuñ bhaTaktī huī nazar se kaash

vahīñ-vahīñ pe na jaatī jahāñ-jahāñ ga.ī hai

har ek shai pe mujhe e'tibār aane lagā

yaqīñ kī lahr ba-andāza-e-gumāñ ga.ī hai

samajh na ḳhud ko tū ai bahr-e-bekarāñ tanhā

nazar bhī saath tire ho ke be-karāñ ga.ī hai

hazār sā'at-e-ā.inda ḳhuun rotī hai

ye chashm-e-nam jo kabhī sūe-raftagāñ ga.ī hai

ye mauj is ko chaTānoñ pe sar paTaknā hai

jo ābshār kī jānib ravāñ-davāñ ga.ī hai

har ek niiñd meñ Duube hue shabistāñ tak

balā se koī na jaage magar azaañ ga.ī hai

zamin ka rizq hai ya su-e-asman gai hai

hamare gumbad-e-dil ki sada kahan gai hai

mile kahan se ki ab raegan na hone dun

ye zindagi to meri saKHt raegan gai hai

main dil hi dil mein nasheman ki KHair mangta hun

chaman ki samt saba yun to mehrban gai hai

guman yahi tha ki ab wo shabih-e-KHun-alud

chali gai tah-e-dil se magar kahan gai hai

ye sochta hun bhaTakti hui nazar se kash

wahin-wahin pe na jati jahan-jahan gai hai

har ek shai pe mujhe e'tibar aane laga

yaqin ki lahr ba-andaza-e-guman gai hai

samajh na KHud ko tu ai bahr-e-bekaran tanha

nazar bhi sath tere ho ke be-karan gai hai

hazar sa'at-e-ainda KHun roti hai

ye chashm-e-nam jo kabhi sue-raftagan gai hai

ye mauj is ko chaTanon pe sar paTakna hai

jo aabshaar ki jaanib rawan-dawan gai hai

har ek nind mein Dube hue shabistan tak

bala se koi na jage magar azan gai hai