zamin khanakti rahi aur ghaTa ne kuchh na kaha

zamīñ khanaktī rahī aur ghaTā ne kuchh na kahā

galī tak aa ke bhī kaalī balā ne kuchh na kahā

kahāñ kahāñ pe daraḳhtoñ kī chādareñ utrīñ

lagī vo chup ki barahna havā ne kuchh na kahā

tamām shab paḌī jazboñ pe itnī os ki bas

tamām shab ḳhalish-e-der-pā ne kuchh na kahā

kahāñ bujhe vo darīchoñ se jhāñkte chehre

palaT ke aa.ī to bād-e-sabā ne kuchh na kahā

vo musht-e-ḳhāk kī majbūriyāñ samajhtā hai

jabīñ ke daaġh gine phir ḳhudā ne kuchh na kahā

ajab hai qaht-e-sadā bhī ki jab gire ham log

idhar udhar se kisī ham-navā ne kuchh na kahā

to kyā kisī ne use TūTte nahīñ dekhā

to kyā kisī se mire be-vafā ne kuchh na kahā

zamin khanakti rahi aur ghaTa ne kuchh na kaha

gali tak aa ke bhi kali bala ne kuchh na kaha

kahan kahan pe daraKHton ki chadaren utrin

lagi wo chup ki barahna hawa ne kuchh na kaha

tamam shab paDi jazbon pe itni os ki bas

tamam shab KHalish-e-der-pa ne kuchh na kaha

kahan bujhe wo darichon se jhankte chehre

palaT ke aai to baad-e-saba ne kuchh na kaha

wo musht-e-KHak ki majburiyan samajhta hai

jabin ke dagh gine phir KHuda ne kuchh na kaha

ajab hai qaht-e-sada bhi ki jab gire hum log

idhar udhar se kisi ham-nawa ne kuchh na kaha

to kya kisi ne use TuTte nahin dekha

to kya kisi se mere be-wafa ne kuchh na kaha