zamin ki KHak ko KHak-e-shifa banate hue

zamīñ kī ḳhaak ko ḳhāk-e-shifā banāte hue

sināñ tak aa ga.e insāniyat bachāte hue

pakaḌ ke raḳht-e-safar meñ rakhe haiñ kuchh jugnū

chaleñge shab meñ yahī rāsta dikhāte hue

jigar meñ dard uThā to kisī kī yaad aa.ī

chhalak ga.iiñ mirī āñkheñ ġhazal sunāte hue

azān-e-sub.h-e-shahādat meñ ho ga.e shāmil

charāġh-e-jazba-e-nusrat kī lau baḌhāte hue

lahū Tapakne lagā merī chashm-e-ġhairat se

barahna sar ke liye ik ridā banāte hue

dayār-e-shām qayāmat meñ ho gayā tabdīl

kuchh aise aa.e haiñ ḳhurshīd jagmagāte hue

har ek chehra-e-parvāna-e-vafā ko paḌhā

charāġh-e-ḳhema-e-ansār ko bujhāte hue

kabhī añdheroñ kabhī sard mausamoñ se laḌe

ham apnī jism kī poshāk ko jalāte hue

kisī kī yād-e-shahādat kā in.iqād kiyā

zarā sī der lagī āsmāñ bulāte hue

bachā ke le ga.e girdāb se safīne ko

ham apne ḳhuun ke sailāb meñ nahāte hue

kisī ne aisī rah-e-mustaqīm dikhlā.ī

sañbhal ga.e ka.ī afrād laḌkhaḌāte hue

koī ḳhudā.ī kā us kī nahīñ hai da.ave-dār

ye kaun mar gayā ḳhud ko ḳhudā batāte hue

sunā hai maare ga.e vo fasād meñ bachche

hameñ salām jo karte the āte-jāte hue

tamām us kā sar-e-ibtidā huā na 'rafī.a'

zamāne ho ga.e jo dāstāñ sunāte hue

zamin ki KHak ko KHak-e-shifa banate hue

sinan tak aa gae insaniyat bachate hue

pakaD ke raKHt-e-safar mein rakhe hain kuchh jugnu

chalenge shab mein yahi rasta dikhate hue

jigar mein dard uTha to kisi ki yaad aai

chhalak gain meri aankhen ghazal sunate hue

azan-e-subh-e-shahadat mein ho gae shamil

charagh-e-jazba-e-nusrat ki lau baDhate hue

lahu Tapakne laga meri chashm-e-ghairat se

barahna sar ke liye ek rida banate hue

dayar-e-sham qayamat mein ho gaya tabdil

kuchh aise aae hain KHurshid jagmagate hue

har ek chehra-e-parwana-e-wafa ko paDha

charagh-e-KHema-e-ansar ko bujhate hue

kabhi andheron kabhi sard mausamon se laDe

hum apni jism ki poshak ko jalate hue

kisi ki yaad-e-shahadat ka iniqad kiya

zara si der lagi aasman bulate hue

bacha ke le gae girdab se safine ko

hum apne KHun ke sailab mein nahate hue

kisi ne aisi rah-e-mustaqim dikhlai

sanbhal gae kai afrad laDkhaDate hue

koi KHudai ka us ki nahin hai dawe-dar

ye kaun mar gaya KHud ko KHuda batate hue

suna hai mare gae wo fasad mein bachche

hamein salam jo karte the aate-jate hue

tamam us ka sar-e-ibtida hua na 'rafia'

zamane ho gae jo dastan sunate hue