zamin ko bhi KHala se misal di jae

zamīn ko bhī ḳhalā se misāl dī jaa.e

jo zindagī se mohabbat nikāl dī jaa.e

nikal hī aa.egā har mas.ale kā hal ḳhud hī

jo darmiyān se hujjat nikāl dī jaa.e

phir us ke baa'd to mashq-e-suḳhan akārat hai

agar ḳhayāl se jiddat nikāl dī jaa.e

mirī nazar meñ hai vo shaḳhs rahm ke qābil

ki jis ke maal se barakat nikāl dī jaa.e

qubūl hai ye tamannāoñ kā hujūm mujhe

magar ye vasl kī hasrat nikāl dī jaa.e

'munīr' ḳhalq-e-ḳhudā ko mile sukūn kā saañs

mire vatan se siyāsat nikāl dī jaa.e

zamin ko bhi KHala se misal di jae

jo zindagi se mohabbat nikal di jae

nikal hi aaega har masale ka hal KHud hi

jo darmiyan se hujjat nikal di jae

phir us ke ba'd to mashq-e-suKHan akarat hai

agar KHayal se jiddat nikal di jae

meri nazar mein hai wo shaKHs rahm ke qabil

ki jis ke mal se barakat nikal di jae

qubul hai ye tamannaon ka hujum mujhe

magar ye wasl ki hasrat nikal di jae

'munir' KHalq-e-KHuda ko mile sukun ka sans

mere watan se siyasat nikal di jae