zamin ko khinch ke main su-e-asman le jaun

zamīñ ko khīñch ke maiñ sū-e-asmāñ le jā.ūñ

ye dil kā dard hai is dard ko kahāñ le jā.ūñ

ye dil ajiib sī ik kashmakash se hai do-chār

natīja ek sā hogā ise jahāñ le jā.ūñ

yahāñ to gul bhī samāte nahīñ in āñkhoñ meñ

batā kahāñ maiñ ye chehrā dhuāñ dhuāñ le jā.ūñ

likhā to hai mirī be-ḳhvāb sī in āñkhoñ meñ

maiñ apne-āp ko duniyā se rā.egāñ le jā.ūñ

yahāñ tak aa ke palaTnā bhī mere bas meñ nahīñ

maiñ kis Thikāne 'ravish' ab ye jism o jaañ le jā.ūñ

zamin ko khinch ke main su-e-asman le jaun

ye dil ka dard hai is dard ko kahan le jaun

ye dil ajib si ek kashmakash se hai do-chaar

natija ek sa hoga ise jahan le jaun

yahan to gul bhi samate nahin in aankhon mein

bata kahan main ye chehra dhuan dhuan le jaun

likha to hai meri be-KHwab si in aankhon mein

main apne-ap ko duniya se raegan le jaun

yahan tak aa ke palaTna bhi mere bas mein nahin

main kis Thikane 'rawish' ab ye jism o jaan le jaun