zamin mein raunaqen jitni hain aasman mein nahin

zamīñ meñ raunaqeñ jitnī haiñ āsmāñ meñ nahīñ

yaqīn meñ jo ujālā hai vo gumāñ meñ nahīñ

qubūl-e-ām kā darja bayāñ ko mil jaatā

adā-e-husn-e-ta’alluq mirī zabāñ meñ nahīñ

ba-har usuul qafas hī kī ek sūrat hai

agar sukūñ kā tasavvur hī āshiyāñ meñ nahīñ

zarā nazar se hijāb-e-nazar to uThne do

usī makāñ meñ mileñge vo jis makāñ meñ nahīñ

vo mere raaz chhupā.egā har tarīqe se

abhī ḳhulūs kā ehsās tarjumāñ meñ nahīñ

ab un se rābta qaa.em rahe to kaise rahe

koī nibāh kī sūrat hī darmiyāñ meñ nahīñ

kise batā.ūñ ki sar par ġhamoñ kā sūraj hai

ye vaqt vo hai ki saaya bhī sā.ebāñ meñ nahīñ

kisī kā ghar ho vahāñ se gurez behtar hai

jahāñ shu.ūr-e-mudārāt mezbāñ meñ nahīñ

chaman kā dard use kis tarah se hogā 'sirāj'

ki jab vatan kī mohabbat hī pāsbāñ meñ nahīñ

zamin mein raunaqen jitni hain aasman mein nahin

yaqin mein jo ujala hai wo guman mein nahin

qubul-e-am ka darja bayan ko mil jata

ada-e-husn-e-ta’alluq meri zaban mein nahin

ba-har usul qafas hi ki ek surat hai

agar sukun ka tasawwur hi aashiyan mein nahin

zara nazar se hijab-e-nazar to uThne do

usi makan mein milenge wo jis makan mein nahin

wo mere raaz chhupaega har tariqe se

abhi KHulus ka ehsas tarjuman mein nahin

ab un se rabta qaem rahe to kaise rahe

koi nibah ki surat hi darmiyan mein nahin

kise bataun ki sar par ghamon ka suraj hai

ye waqt wo hai ki saya bhi saeban mein nahin

kisi ka ghar ho wahan se gurez behtar hai

jahan shuur-e-mudaraat mezban mein nahin

chaman ka dard use kis tarah se hoga 'siraj'

ki jab watan ki mohabbat hi pasban mein nahin