zamin pe aane se sanson ke ruTh jaane tak

zamīñ pe aane se sāñsoñ ke ruuTh jaane tak

ye ik safar hai musalsal qazā ke shāne tak

jo kā.enāt pe haq apnā maan baiThe the

unheñ bhī aanā paḌā āḳhirī Thikāne tak

zamīñ pe dil kī mohabbat javān hotī rahī

vafā kī dhuup pe bādal jafā ke chhāne tak

phir us ke ba.ad huā kyā mujhe nahīñ ma.alūm

maiñ hosh meñ rahī but ko ḳhudā banāne tak

sunā hai aap ināyat sabhī pe karte haiñ

kabhī to aa.eñ hamāre ġharīb-ḳhāne tak

nahīñ hai umr koī tai kisī bhī rishte kī

rahegā saath koī sirf āzmāne tak

zamin pe aane se sanson ke ruTh jaane tak

ye ek safar hai musalsal qaza ke shane tak

jo kaenat pe haq apna man baiThe the

unhen bhi aana paDa aaKHiri Thikane tak

zamin pe dil ki mohabbat jawan hoti rahi

wafa ki dhup pe baadal jafa ke chhane tak

phir us ke baad hua kya mujhe nahin malum

main hosh mein rahi but ko KHuda banane tak

suna hai aap inayat sabhi pe karte hain

kabhi to aaen hamare gharib-KHane tak

nahin hai umr koi tai kisi bhi rishte ki

rahega sath koi sirf aazmane tak