zamin pe chand utarta dikhai deta hai

zamīñ pe chāñd utartā dikhā.ī detā hai

tirā ḳhayāl bhī tujh sā dikhā.ī detā hai

jo saath le ke chalā thā hazār hangāme

vo shaḳhs aaj akelā dikhā.ī detā hai

havā chalī to añdheroñ kī aag tez huī

har ek ḳhvāb pighaltā dikhā.ī detā hai

ye shahr haiñ ki sadāoñ ke gūñjte jangal

nā koī jism nā chehra dikhā.ī detā hai

badalte jaate haiñ alfāz sūrateñ apnī

chalo to ye bhī tamāsha dikhā.ī detā hai

baḌe ajiib haiñ ye dard-o-ġham ke rishte bhī

ki jis ko dekhiye apnā dikhā.ī detā hai

jo ham nahīñ to vahāñ aur koī ham jaisā

ġhamoñ kī dhuup meñ jaltā dikhā.ī detā hai

nahā rahe haiñ badan vaqt ke ujāloñ meñ

diloñ ke paas añdherā dikhā.ī detā hai

dayār-e-shauq ho yā dasht-e-be-karāñ 'jāmī'

kahāñ kahāñ koī tanhā dikhā.ī detā hai

zamin pe chand utarta dikhai deta hai

tera KHayal bhi tujh sa dikhai deta hai

jo sath le ke chala tha hazar hangame

wo shaKHs aaj akela dikhai deta hai

hawa chali to andheron ki aag tez hui

har ek KHwab pighalta dikhai deta hai

ye shahr hain ki sadaon ke gunjte jangal

na koi jism na chehra dikhai deta hai

badalte jate hain alfaz suraten apni

chalo to ye bhi tamasha dikhai deta hai

baDe ajib hain ye dard-o-gham ke rishte bhi

ki jis ko dekhiye apna dikhai deta hai

jo hum nahin to wahan aur koi hum jaisa

ghamon ki dhup mein jalta dikhai deta hai

naha rahe hain badan waqt ke ujalon mein

dilon ke pas andhera dikhai deta hai

dayar-e-shauq ho ya dasht-e-be-karan 'jami'

kahan kahan koi tanha dikhai deta hai