zamin pe eDi ragaD ke pani nikalta hun

zamīñ pe eḌī ragaḌ ke paanī nikāltā huuñ

maiñ tishnagī ke na.e ma.ānī nikāltā huuñ

vahī barāmad karūñgā jo chiiz kaam kī hai

zabāñ ke bātin se be-zabānī nikāltā huuñ

falak pe likhtā huuñ ḳhāk-e-ḳhvābīda ke manāzir

zamīn se rañg-e-āsmānī nikāltā huuñ

kabhī kabūtar kī tarah lagtā hai abr mujh ko

kabhī havā se koī kahānī nikāltā huuñ

bahut zarūrī hai merā apnī hadoñ meñ rahnā

so bahr se ḳhud hī be-karānī nikāltā huuñ

kabhī mulāqāt ho mayassar to is se pahle

dimāġh se saarī ḳhush-gumānī nikāltā huuñ

jo chheḌtā huuñ nayā koī naġhma-e-mohabbat

to sāz-e-dil se dhuneñ purānī nikāltā huuñ

koī Thahar kar bhī dekhnā chāhtā huuñ manzar

isī liye tab.a se ravānī nikāltā huuñ

'zafar' mire sāmne Thahartā nahīñ hai koī

to apne paikar se apnā saanī nikāltā huuñ

zamin pe eDi ragaD ke pani nikalta hun

main tishnagi ke nae maani nikalta hun

wahi baramad karunga jo chiz kaam ki hai

zaban ke baatin se be-zabani nikalta hun

falak pe likhta hun KHak-e-KHwabida ke manazir

zamin se rang-e-asmani nikalta hun

kabhi kabutar ki tarah lagta hai abr mujh ko

kabhi hawa se koi kahani nikalta hun

bahut zaruri hai mera apni hadon mein rahna

so bahr se KHud hi be-karani nikalta hun

kabhi mulaqat ho mayassar to is se pahle

dimagh se sari KHush-gumani nikalta hun

jo chheDta hun naya koi naghma-e-mohabbat

to saz-e-dil se dhunen purani nikalta hun

koi Thahar kar bhi dekhna chahta hun manzar

isi liye taba se rawani nikalta hun

'zafar' mere samne Thaharta nahin hai koi

to apne paikar se apna sani nikalta hun