zamin pe jab se mayassar hua makan mujhko

zamīñ pe jab se mayassar huā makāñ mujh ko

adab se qibla banā.e hai āsmāñ mujh ko

utar ke dariyā se honā hai kāmrāñ mujh ko

phir ek baar jalānī haiñ kashtiyāñ mujh ko

mujhe kahīñ kā na rakhte ye Dagmagāte paañv

sañbhāl le ga.iiñ kuchh merī nekiyāñ mujh ko

ye aur baat ki maiñ gard-e-kārvāñ bhī nahīñ

agarche honā thā sālār-e-kārvāñ mujh ko

jo lafz chhoTe haiñ kis tarh chhū sakeñge mujhe

ḳhudā ne dī haiñ suḳhan kī bulandiyāñ mujh ko

bahut jadīd hai duniyā ise ḳhabar bhī nahīñ

sunā rahā hai purānī kahāniyāñ mujh ko

maiñ apnī sat.h se nīche utar ke kyā kartā

pukārtī hī rahīñ kam-nigāhiyāñ mujh ko

maiñ koī aisā hunar-mand bhī na thā lekin

mire hunar ke mile phir bhī qadr-dāñ mujh ko

darāz hotī ga.ī zindagī kī kaalī raat

'ra.īs' raas na aa.e ye jism-o-jāñ mujh ko

zamin pe jab se mayassar hua makan mujh ko

adab se qibla banae hai aasman mujh ko

utar ke dariya se hona hai kaamran mujh ko

phir ek bar jalani hain kashtiyan mujh ko

mujhe kahin ka na rakhte ye Dagmagate panw

sanbhaal le gain kuchh meri nekiyan mujh ko

ye aur baat ki main gard-e-karwan bhi nahin

agarche hona tha salar-e-karwan mujh ko

jo lafz chhoTe hain kis tarh chhu sakenge mujhe

KHuda ne di hain suKHan ki bulandiyan mujh ko

bahut jadid hai duniya ise KHabar bhi nahin

suna raha hai purani kahaniyan mujh ko

main apni sath se niche utar ke kya karta

pukarti hi rahin kam-nigahiyan mujh ko

main koi aisa hunar-mand bhi na tha lekin

mere hunar ke mile phir bhi qadr-dan mujh ko

daraaz hoti gai zindagi ki kali raat

'rais' ras na aae ye jism-o-jaan mujh ko