zamin pe khulti rahi hain kaliyan falak pe tare uga kiye hain

zamīñ pe khultī rahī haiñ kaliyāñ falak pe taare ugā kiye haiñ

yahī karishme huā kareñge yahī karishme huā kiye haiñ

junūñ nahīñ hai ki chāk-e-dāman ko ābrū-e-bahār samjheñ

ḳhizāñ kī yalġhār meñ bhī hamdam ham apnā dāman siyā kiye haiñ

kise ḳhabar thī ki mai-parastoñ ko un kī ḳhātir aziiz hogā

vo zahr-e-ġham jo na thā gavārā vo zahr-e-ġham jo piyā kiye haiñ

ḳhudā hai shāhid ki zindagī meñ vo sajda-hā-e-ġham-e-mohabbat

qazā hue the jo gāhe-gāhe ba-shart-e-fursat adā kiye haiñ

nahīñ hai mauqūf sar-kashī par mire lahū meñ kuchh aur bhī hai

hazār pahlū haiñ kufr-o-dīñ ke jo apne haq meñ ravā kiye haiñ

uThāo miinā ki shām-e-ġham ko sahar ke anvār se badal deñ

ye dāġh-e-hasrat to be-takalluf jalā kareñge jalā kiye haiñ

zamin pe khulti rahi hain kaliyan falak pe tare uga kiye hain

yahi karishme hua karenge yahi karishme hua kiye hain

junun nahin hai ki chaak-e-daman ko aabru-e-bahaar samjhen

KHizan ki yalghaar mein bhi hamdam hum apna daman siya kiye hain

kise KHabar thi ki mai-paraston ko un ki KHatir aziz hoga

wo zahr-e-gham jo na tha gawara wo zahr-e-gham jo piya kiye hain

KHuda hai shahid ki zindagi mein wo sajda-ha-e-gham-e-mohabbat

qaza hue the jo gahe-gahe ba-shart-e-fursat ada kiye hain

nahin hai mauquf sar-kashi par mere lahu mein kuchh aur bhi hai

hazar pahlu hain kufr-o-din ke jo apne haq mein rawa kiye hain

uThao mina ki sham-e-gham ko sahar ke anwar se badal den

ye dagh-e-hasrat to be-takalluf jala karenge jala kiye hain