zamin pe maktab-e-adam ka ek nisab hai ishq

zamīñ pe maktab-e-ādam kā ik nisāb hai ishq

likhī ga.ī jo azal meñ vahī kitāb hai ishq

hudūd-e-zāt ke andar bhī shor-o-shar us kā

hudūd-e-zāt ke bāhar bhī iztirāb hai ishq

junūñ kī tah se jo ubhre to gauhar-e-nāyāb

havas kī mauj pe aa.e to ik habāb hai ishq

kisī savāl kī sūrat hai kā.enāt tamām

aur is savāl kā āsān sā javāb hai ishq

sameT leñ jo nigāheñ to husn-e-lailā tak

bikher deñ jo fazā meñ to be-hisāb hai ishq

varaq varaq pe hai bikhrā mire vajūd kā rañg

ye kis ke haath kī likkhī huī kitāb hai ishq

fazā-e-lailā-e-shab meñ hai raushnī us kī

'ziyā'-e-naḳhvat-e-shīrīñ kā āftāb hai ishq

zamin pe maktab-e-adam ka ek nisab hai ishq

likhi gai jo azal mein wahi kitab hai ishq

hudud-e-zat ke andar bhi shor-o-shar us ka

hudud-e-zat ke bahar bhi iztirab hai ishq

junun ki tah se jo ubhre to gauhar-e-nayab

hawas ki mauj pe aae to ek habab hai ishq

kisi sawal ki surat hai kaenat tamam

aur is sawal ka aasan sa jawab hai ishq

sameT len jo nigahen to husn-e-laila tak

bikher den jo faza mein to be-hisab hai ishq

waraq waraq pe hai bikhra mere wajud ka rang

ye kis ke hath ki likkhi hui kitab hai ishq

faza-e-laila-e-shab mein hai raushni us ki

'ziya'-e-naKHwat-e-shirin ka aaftab hai ishq